ಸಾವಿರಾರು ಭಾವಗಳಿಗೆ ಜೀವ ತುಂಬಿದ್ದ ಅದ್ಭುತ ಚೇತನ ಆಶಾ ಭೋಂಸ್ಲೆ!

ಭಾರತೀಯ ಸಂಗೀತ ಲೋಕದ ಇತಿಹಾಸದ ಪುಟಗಳನ್ನು ತಿರುವಿ ನೋಡಿದರೆ ಅಲ್ಲಿ ಕೇಳಿಬರುವ ಒಂದು ಅದ್ಭುತ ಧ್ವನಿ ಆಶಾ ಭೋಂಸ್ಲೆ ಅವರದ್ದು. ಅದು ಕೇವಲ ಧ್ವನಿಯಾಗಿರಲಿಲ್ಲ, ಅಲ್ಲೊಂದು ಅದ್ಭುತ ಶಕ್ತಿಯಿತ್ತು. ಎಂಥವರನ್ನೂ ಸೆಳೆಯುವ ತಾಕತ್ತು ಅದಕ್ಕಿತ್ತು.

ದಂತಕಥೆ ಲತಾ ಮಂಗೇಶ್ಕರ್ ಅವರ ಕಿರಿಯ ಸಹೋದರಿಯಾಗಿ ಜನಿಸಿದ ಆಶಾ ಅವರ ಬದುಕು ಹೂವಿನ ಹಾಸಿಗೆಯಾಗಿರಲಿಲ್ಲ. ಪ್ರತಿಭೆಗಳ ಕಣವಾಗಿದ್ದ ಅವರದ್ದು, ಸವಾಲುಗಳು ಹಾಗೂ ಛಲದ ಹಾದಿಯಾಗಿತ್ತು. ಅಕ್ಕನ ಅಗಾಧ ಯಶಸ್ಸಿನ ನೆರಳಿನಲ್ಲಿ ಕಳೆದುಹೋಗದೆ, ತನ್ನದೇ ಆದ ವಿಶಿಷ್ಟ ‘ಸ್ವರ ಸಾಮ್ರಾಜ್ಯ’ವನ್ನು ಕಟ್ಟಿಕೊಂಡ ಈ ಗಾನಕೋಗಿಲೆಯ ಪಯಣ ಪ್ರತಿಯೊಬ್ಬರಿಗೂ ಸ್ಫೂರ್ತಿದಾಯಕ.

ಅಕ್ಕನ ನೆರಳಿನಿಂದ ಅನನ್ಯತೆಯತ್ತ..!

ಆಶಾ ಅವರ ಸಂಗೀತ ಜೀವನ ಆರಂಭವಾಗಿದ್ದು ಕೇವಲ 9 ವರ್ಷದ ಬಾಲಕಿಯಾಗಿದ್ದಾಗ. ಆಗಲೇ ಅಕ್ಕ ಲತಾ ಅವರು ಸಂಗೀತ ಲೋಕದ ಧ್ರುವತಾರೆಯಾಗಿ ಮಿಂಚುತ್ತಿದ್ದರು. ಆರಂಭದ ದಿನಗಳಲ್ಲಿ ಆಶಾ ಅವರಿಗೆ ಸಿಗುತ್ತಿದ್ದ ಅವಕಾಶಗಳು ಕೇವಲ ಎರಡನೇ ದರ್ಜೆಯವು ಎನ್ನಲಾಗುತ್ತಿತ್ತು. ಅಕ್ಕನ ಧ್ವನಿಗೆ ಮೆಲೊಡಿ ಹಾಡುಗಳು ಮೀಸಲಾಗಿದ್ದರೆ, ಆಶಾ ಅವರಿಗೆ ದಕ್ಕುತ್ತಿದ್ದುದು ತುಂಟಾಟದ, ಕ್ಯಾಬರೆ ಅಥವಾ ನೃತ್ಯದ ಹಾಡುಗಳು. ಆದರೆ, ಆ ಸವಾಲನ್ನೇ ವರವಾಗಿ ಸ್ವೀಕರಿಸಿದ ಆಶಾ, ಅಕ್ಕನ ನೆರಳಿನಿಂದ ಹೊರಬಂದು ತನ್ನ ಧ್ವನಿಯಲ್ಲಿನ ಮಾದಕತೆ, ವೈವಿಧ್ಯತೆ ಮತ್ತು ತಾಂತ್ರಿಕ ನೈಪುಣ್ಯತೆಯ ಮೂಲಕ ಹೊಸ ಇತಿಹಾಸ ಬರೆದರು. ‘ಲತಾ ಅವರ ತಂಗಿ’ ಎಂಬ ಹಣೆಪಟ್ಟಿಯನ್ನು ಮೀರಿ ‘ಆಶಾ ಭೋಂಸ್ಲೆ’ ಎಂಬ ಬ್ರ್ಯಾಂಡ್ ಸೃಷ್ಟಿಸಿದರು

ಆ ಧ್ವನಿಯಲ್ಲಿತ್ತು ಮಾಂತ್ರಿಕಶಕ್ತಿ

ಆಶಾ ಅವರ ಧ್ವನಿಯಲ್ಲಿ ಒಂದು ಮ್ಯಾಜಿಕ್ ಇತ್ತು. ಅದು ‘ದಮ್ ಮಾರೋ ದಮ್’ ಎಂದು ಕಿರುಚಬಲ್ಲದು, ‘ಉಮ್ರಾವ್ ಜಾನ್’ನಂಥ ಚಿತ್ರದ ಗಜಲ್‌ಗಳಲ್ಲಿ ಕಣ್ಣೀರು ತರಿಸಬಲ್ಲದು. ಹಿರಿಯ ಸಂಗೀತ ನಿರ್ದೇಶಕರು ಅವರ ಮೇಲೆ ನಂಬಿಕೆ ಇಟ್ಟಾಗ, ಆಶಾ ಅದನ್ನು ರಾಷ್ಟ್ರ ಪ್ರಶಸ್ತಿಗಳ ಮೂಲಕ ಸಾಬೀತುಪಡಿಸಿದರು. ಶಾಸ್ತ್ರೀಯ ಸಂಗೀತದಿಂದ ಹಿಡಿದು ಪಾಪ್ ಸಂಗೀತದವರೆಗೆ ಅವರು ಸಾಗದ ಹಾದಿಯಿಲ್ಲ. ವಿಶ್ವದಲ್ಲೇ ಅತಿ ಹೆಚ್ಚು ಹಾಡುಗಳನ್ನು ಹಾಡಿದ ಗಾಯಕಿ ಎಂಬ ಗಿನ್ನೆಸ್ ದಾಖಲೆ ಅವರ ಹೆಸರಲ್ಲಿದೆ ಎನ್ನುವುದೇ ಅವರ ನಿರಂತರ ಪರಿಶ್ರಮಕ್ಕೆ ಸಾಕ್ಷಿ.

ಬಂಡಾಯದ ಬದುಕು

ಆಶಾ ಅವರ ವೈಯಕ್ತಿಕ ಜೀವನವೂ ಅವರ ಹಾಡುಗಳಂತೆಯೇ ಏಳುಬೀಳುಗಳಿಂದ ಕೂಡಿತ್ತು. ಕೇವಲ 16ನೇ ವಯಸ್ಸಿನಲ್ಲಿ ಕುಟುಂಬದ ವಿರೋಧವನ್ನೂ ಮೀರಿ ಪ್ರೇಮವಿವಾಹವಾದ ಸಾಹಸಿ ಅವರು. ಆ ಸಂಬಂಧ ಮುರಿದುಬಿದ್ದಾಗ, ಮೂವರು ಮಕ್ಕಳೊಂದಿಗೆ ತವರಿಗೆ ಮರಳಿದರೂ ಅವರು ಸೋಲೊಪ್ಪಲಿಲ್ಲ. ಬದುಕಿನ ಕಠಿಣ ಸವಾಲುಗಳ ನಡುವೆಯೂ ಅವರು ‘ಭೋಂಸ್ಲೆ’ ಎಂಬ ಹೆಸರನ್ನು ಅಳಿಸಿಕೊಳ್ಳದೆ ಅದನ್ನು ಯಶಸ್ಸಿನ ಶಿಖರಕ್ಕೆ ಏರಿಸಿದರು. ನಂತರ ಆರ್.ಡಿ. ಬರ್ಮನ್ ಅವರೊಂದಿಗೆ ನಡೆದ ಅವರ ಜೀವನದ ಎರಡನೇ ಪರ್ವವು ಸಂಗೀತ ಲೋಕಕ್ಕೆ ಅನೇಕ ಅಮರ ಗೀತೆಗಳನ್ನು ಕೊಡುಗೆಯಾಗಿ ನೀಡಿತು.

ಸುವರ್ಣ ಯುಗದ ಕೊನೆಯ ಕೊಂಡಿ

ಲತಾ ಮಂಗೇಶ್ಕರ್, ಮೊಹಮ್ಮದ್ ರಫಿ, ಕಿಶೋರ್ ಕುಮಾರ್ ಮತ್ತು ಮುಕೇಶ್ ಅವರಂತಹ ದೈತ್ಯ ಪ್ರತಿಭೆಗಳ ನಡುವೆ ಹಿರಿಯಕ್ಕನ ಚಾಕಚಕ್ಯತೆ ಮತ್ತು ಕಿರಿಯಕ್ಕನ ತುಂಟಾಟ ಎರಡನ್ನೂ ಮೈಗೂಡಿಸಿಕೊಂಡವರು ಆಶಾ. ಆ ಯುಗದ ಕೊನೆಯ ಕೊಂಡಿಯಾಗಿ ಅವರು ಭಾರತೀಯ ಚಿತ್ರರಂಗದ ಏರಿಳಿತಗಳನ್ನು ಹತ್ತಿರದಿಂದ ಕಂಡವರು.
ಆಶಾ ಭೋಂಸ್ಲೆ ಎಂದರೆ ಕೇವಲ ಹಾಡುಗಾರ್ತಿಯಲ್ಲ; ಅವರು ಹೋರಾಟದ ಸಂಕೇತ, ಪ್ರತಿಭೆಯ ಪರ್ಯಾಯ ನಾಮ. ಅವರ ನಿಧನದ ಮೂಲಕ ಅವರ ಅವರ ಭೌತಿಕ ಕಾಯ ಮರೆಯಾದರೂ, ಆ ಧ್ವನಿ ಮಾತ್ರ ಎಲ್ಲರೆದೆಯಲ್ಲೂ ಅಮರವಾಗಿ ಉಳಿಯಲಿದೆ.

ಇದನ್ನೂ ಓದಿ : ಸಂಗೀತ ಲೋಕದ ಧ್ರುವತಾರೆ ಅಸ್ತಂಗತ – ಗಾಯಕಿ ಆಶಾ ಭೋಂಸ್ಲೆ ಇನ್ನಿಲ್ಲ