ಬೆಂಗಳೂರು: ರಾಜ್ಯ ಸರ್ಕಾರಿ ನೌಕರರು ಮತ್ತು ಅವರ ಅವಲಂಬಿತ ಕುಟುಂಬದವರಿಗಾಗಿ ಕರ್ನಾಟಕ ಸರ್ಕಾರವು ಕರ್ನಾಟಕ ಆರೋಗ್ಯ ಸಂಜೀವಿನಿ (KASS) ಯೋಜನೆ ಜಾರಿಗೆ ತಂದಿದೆ. ಯೋಜನೆ ಮೂಲಕ ನಗದು ರಹಿತ (Cashless) ವೈದ್ಯಕೀಯ ಚಿಕಿತ್ಸೆ ನೀಡುವುದು ಗುರಿಯಾಗಿದೆ. ಈಗ ರಾಜ್ಯ ಸರ್ಕಾರಿ ನೌಕರರು ಯೋಜನೆಯನ್ನು ಆಯ್ಕೆ ಮಾಡಿಕೊಳ್ಳಲು ಅಥವಾ ಆಯ್ಕೆ ಮಾಡಿಕೊಳ್ಳದಿರುವ ಕುರಿತು ಫೆಬ್ರವರಿಯೊಳಗೆ ಅಂತಿಮ ತೀರ್ಮಾನ ಪ್ರಕಟಿಸಬೇಕು ಎಂದು ರಾಜ್ಯ ಸರ್ಕಾರ ಆದೇಶಿಸಿದೆ.
ಫೆಬ್ರವರಿ 28ರೊಳಗೆ ನೌಕರರು ಯೋಜನೆಯನ್ನು ಆಯ್ಕೆ ಮಾಡಿಕೊಳ್ಳದಿದ್ದರೆ ಅಥವಾ ಹೊರಗುಳಿಯುವ ಕುರಿತು ದೃಢೀಕರಣ ಮಾಡದಿದ್ದರೆ, ಅವರು ಯೋಜನೆಯ ಸದಸ್ಯರು ಎಂದು ಪರಿಗಣಿಸಲಾಗುತ್ತದೆ. ಅದರಂತೆ, ಪ್ರತಿ ತಿಂಗಳು ಯೋಜನೆಯ ಪ್ರೀಮಿಯಂ ಕಡಿತಗೊಳಿಸಲಾಗುತ್ತದೆ.
ಯೋಜನೆಗೆ ಒಳಪಡಲು ಏನು ಮಾಡಬೇಕು?
• ಮೊದಲಿಗೆ ನೌಕರರು HRMS ಪೋರ್ಟಲ್ ಆಗಿರುವ https://hrms.karnataka.gov.in ಗೆ ಭೇಟಿ ನೀಡಬೇಕು
• ಸರ್ವಿಸ್ ರಿಜಿಸ್ಟರ್ ಅಡಿಯಲ್ಲಿ ‘Family Dependent Entry Form’ ಆಯ್ಕೆ ಮಾಡಿ, ಕೆಜಿಐಡಿ ಸಂಖ್ಯೆ ನಮೂದಿಸಬೇಕು. ಅಲ್ಲದೆ, ನೌಕರರ ಕುಟುಂಬಸ್ಥರ ಮಾಹಿತಿ ಅಪ್ ಲೋಡ್ ಮಾಡಬೇಕು
• ಆಧಾರ್ ಸಂಖ್ಯೆಯನ್ನು ಕಡ್ಡಾಯವಾಗಿ ದೃಢೀಕರಿಸಬೇಕು
• ನೌಕರರ ಮತ್ತು ಡಿಡಿಒಗಳ ಸಹಿ ಇರುವ ಘೋಷಣಾ ಪತ್ರವನ್ನು ಪಿಡಿಎಫ್ ರೂಪದಲ್ಲಿ ಅಪ್ ಲೋಡ್ ಮಾಡಬೇಕು
• ಡಿಡಿಒಗಳು ಈ ಅರ್ಜಿಗಳನ್ನು ಡಿಜಿಟಲ್ ಸಹಿ ಅಥವಾ ಮೊಬೈಲ್ ಗೆ ಬರುವ ಒಟಿಪಿ ಮೂಲಕ ಅನುಮೋದನೆ ನೀಡಬಹುದು
ಯೋಜನೆಯಿಂದ ಹೊರಗುಳಿಯಲು ಇಚ್ಛಿಸುವವರು ಕೂಡ ದೃಢೀಕರಣ ಪ್ರಮಾಣಪತ್ರವನ್ನು ಅಪ್ ಲೋಡ್ ಮಾಡಬೇಕು. ಈಗಾಗಲೇ ರಾಜ್ಯ ಸರ್ಕಾರದ ಬೇರೆ ವಿಮಾ ಯೋಜನೆಯ ಫಲಾನುಭವಿ ಆಗಿರುವವರು ಸೇರಿ ಕೆಲವು ಸಂದರ್ಭಗಳಲ್ಲಿ ಮಾತ್ರ ಸರ್ಕಾರಿ ನೌಕರರು ಯೋಜನೆಯಿಂದ ಹೊರಗುಳಿಯಲು ಅವಕಾಶವಿದೆ.
ಇದನ್ನೂ ಓದಿ : RBI ಮಹತ್ವದ ಘೋಷಣೆ | ಆನ್ಲೈನ್ ವಂಚನೆಯಾದರೆ ಜನರಿಗೆ ಎಷ್ಟು ಪರಿಹಾರ ಸಿಗಲಿದೆ ಗೊತ್ತಾ?
