ಹೊಸದಾಗಿ ಹೂಡಿಕೆ ಮಾಡ್ತಿದಿರಾ? ಹಾಗಾದ್ರೆ ಇವುಗಳು ನಿಮ್ಮ ತಲೆಯಲ್ಲಿರಲಿ

ಬೆಂಗಳೂರು: ಈಗಷ್ಟೇ ಕೆಲಸಕ್ಕೆ ಸೇರಿರುತ್ತೀರಿ. ಇಲ್ಲವೆ, ಈಗಷ್ಟೇ ಹೂಡಿಕೆ ಮಾಡಲು ತೀರ್ಮಾನಿಸಿರುತ್ತೀರಿ. ನಿಮ್ಮ ಗೆಳೆಯರೋ, ಸಹೋದ್ಯೋಗಿಗಳೋ ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುತ್ತಾರೆ. ಮ್ಯೂಚುವಲ್ ಫಂಡ್ ನಲ್ಲಿ ಹೆಚ್ಚು ರಿಟರ್ನ್ಸ್ ಪಡೆದಿದ್ದಾರೆ ಎಂದು ನೀವೂ ಹೂಡಿಕೆ ಮಾಡಲು ಹೊರಡುತ್ತೀರಿ. ಆದರೆ, ಹೀಗೆ ಷೇರುಪೇಟೆ ಅಥವಾ ಮ್ಯೂಚುವಲ್ ಫಂಡ್ ಸೇರಿ ಯಾವುದೇ ಮಾದರಿಯ ಹೂಡಿಕೆ ಆರಂಭಿಸುವಾಗ ಒಂದಷ್ಟು ಮುಂಜಾಗ್ರತಾ ಕ್ರಮ, ಪಾಲಿಸಬೇಕಾದ ನಿಯಮಗಳು ಇರುತ್ತವೆ. ಹೂಡಿಕೆ ತಜ್ಞರು ಸಾಮಾನ್ಯವಾಗಿ ಹೊಸ ಹೂಡಿಕೆದಾರರಿಗೆ ತಿಳಿಸುವ ಅಂಶಗಳು ಇಲ್ಲಿವೆ ನೋಡಿ.

1. ಯಾವುದೇ ಮಾದರಿಯ ಹೂಡಿಕೆ ಮಾಡುವ ಮುನ್ನ, ಆ ಹೂಡಿಕೆಗೆ ಗುರಿ ಇರಲಿ. ಮದುವೆ, ಮಕ್ಕಳ ಶಿಕ್ಷಣ ಸೇರಿ ಯಾವುದಾದರೂ ಒಂದು ಗುರಿಯೊಂದಿಗೆ ಹೂಡಿಕೆ ಆರಂಭಿಸಿ. ಆಗ ಸುದೀರ್ಘ ಅವಧಿಗೆ ಹೂಡಿಕೆ ಮಾಡಲು ಸಹಕಾರಿಯಾಗುತ್ತದೆ.
2. ಎಫ್ ಆ್ಯಂಡ್ ಓ ಸಹವಾಸಕ್ಕೆ ಹೋಗದಿರಿ. ದಿಢೀರನೆ ದುಡ್ಡು ಮಾಡಬೇಕು ಎಂದು ಎಫ್ ಆ್ಯಂಡ್ ಒ ನಂತಹ ಡೈಲಿ ಟ್ರೇಡಿಂಗ್ ಗೆ ಕೈ ಹಾಕದಿರಿ. ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುವುದು ಎಂದರೆ ರಿಸ್ಕ್ ಇರುತ್ತದೆ ಎಂಬುದು ಗಮನದಲ್ಲಿರಲಿ.
3. ಸಲಹೆ ಪಡೆಯದೆ ಮುನ್ನಡೆಯದಿರಿ. ಯಾವುದೇ ಮಾದರಿಯ ಹೂಡಿಕೆಯನ್ನು ಆರಂಭಿಸುವ ಮೊದಲು ತಜ್ಞರ ಸಲಹೆ ಪಡೆಯಿರಿ.
4. ಗೆಳೆಯರನ್ನು ನೋಡಿ ನೀವೂ ಹೂಡಿಕೆ ಮಾಡಲು ಹೊರಡದಿರಿ. ಹಾಗೆ ಮಾಡಿದರೆ, ನಿಮ್ಮ ಹೂಡಿಕೆ ತುಂಬ ದಿನ ಇರುವುದಿಲ್ಲ. 3, 5, 10, 15 ವರ್ಷಗಳವರೆಗೆ ಹೂಡಿಕೆ ಮಾಡುತ್ತೇನೆ ಎಂದು ಹೊರಡಿ. ಆ ಗುರಿಯನ್ನು ಸಾಧಿಸಲು ಎಲ್ಲ ಪ್ರಯತ್ನ ಮಾಡಿ.
5. ಷೇರು ಮಾರುಕಟ್ಟೆ ಲಾಭ ಎಂದು ಅದರಲ್ಲೇ ಹೂಡಿಕೆ ಮಾಡುವುದು. ಇರುವ ಎಲ್ಲ ಹಣವನ್ನು ಮ್ಯೂಚುವಲ್ ಫಂಡ್ ನಲ್ಲೇ ಹೂಡಿಕೆ ಮಾಡೋ ಬದಲು, ವೈವಿಧ್ಯತೆ ಇರಲಿ. ಒಂದಷ್ಟು ಮೊತ್ತವನ್ನು ಷೇರು ಮಾರುಕಟ್ಟೆ, ಇನ್ನೊಂದಿಷ್ಟು ಮೊತ್ತವನ್ನು ಮ್ಯೂಚುವಲ್ ಫಂಡ್ಸ್, ಮತ್ತೊಂದಿಷ್ಟು ಹಣವನ್ನು ಗೋಲ್ಡ್ ಇಟಿಎಫ್ ಸೇರಿ ವಿವಿಧ ಮಾದರಿಯ ಹೂಡಿಕೆಗಳನ್ನು ಆಯ್ಕೆ ಮಾಡಿಕೊಳ್ಳಿ.