ಬೆಂಗಳೂರು: ಅನಾಮಧೇಯ ವ್ಯಕ್ತಿಗಳು ಕರೆ ಮಾಡಿ ಕ್ರೆಡಿಟ್ ಕಾರ್ಡ್ ಬೇಕಾ? ಲೋನ್ ಬೇಕಾ? ನಿಮ್ಮ ಹಣವನ್ನು ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿ, ಎರಡು ಪಟ್ಟು ಮಾಡಿಕೊಸಬೇಕಾ ಎಂದು ಕೇಳುವ, ಸ್ವಲ್ಪ ಯಾಮಾರಿದರೂ ವಂಚಿಸುವ ಪ್ರಕರಣಗಳು ಜಾಸ್ತಿಯಾಗುತ್ತಿವೆ. ಅದರಲ್ಲೂ, ಏರ್ ಟೆಲ್ ಗ್ರಾಹಕರಿಗೆ ಸುಮಾರು 275 ಕೋಟಿ ಬಾರಿ ಸ್ಪ್ಯಾನ್ ಕರೆಗಳನ್ನು ಮಾಡಲಾಗಿದ್ದು, ಇದರ ವಿರುದ್ಧ ಹೋರಾಡಲು ಕಂಪನಿಯು ಹೊಸ ವ್ಯವಸ್ಥೆಯನ್ನು ಅಳವಡಿಸಿಕೊಂಡಿದೆ.
ಏರ್ ಟೆಲ್ ಕಂಪನಿಯು ಕಳೆದ ವರ್ಷದ ಸೆಪ್ಟೆಂಬರ್ ನಲ್ಲಿ ಸ್ಪ್ಯಾನ್ ಕರೆಗಳನ್ನು ಗುರುತಿಸಲು ಎಐ ಆಧಾರಿತ ಟೂಲ್ ಬಳಸಲು ಆರಂಭಿಸಿತು. ಇದಾದ ಬಳಿಕ ಗ್ರಾಹಕರಿಗೆ 275 ಕೋಟಿ ಬಾರಿ ಸ್ಪ್ಯಾನ್ ಕರೆಗಳನ್ನು ಮಾಡಲಾಗಿದೆ ಎಂಬುದನ್ನು ಎಐ ಪತ್ತೆಹಚ್ಚಿದೆ. ಅಂದರೆ, ಒಂದು ಸೆಕೆಂಡ್ ಗೆ ಸರಾಸರಿ 1,560 ಸ್ಪ್ಯಾಮ್ ಕರೆಗಳನ್ನು ಮಾಡಲಾಗಿದೆ. ಹಾಗಾಗಿ, ಏರ್ ಟೆಲ್ ಈಗ ಸ್ಪ್ಯಾಮ್ ಕರೆಗಳ ವಿರುದ್ಧ ಸಮರ ಸಾರಿದೆ.
ಹೌದು, ಏರ್ ಟೆಲ್ ಕಂಪನಿಯ ಎಐ ಆಧಾರಿತ ಟೂಲ್ ಈಗ ಜನರಿಗೆ ಸ್ಪ್ಯಾನ್ ಕರೆಗಳ ಕುರಿತು ಜಾಗೃತಿ ಮೂಡಿಸಲಿದೆ. ಸ್ಪ್ಯಾಮ್ ಕರೆಗಳನ್ನು ಸ್ವೀಕರಿಸದಿರುವುದು, ಸ್ವಲ್ಪ ಯಾಮಾರಿದರೂ ಮೋಸ ಮಾಡುವ ಕುರಿತು ಮಾಹಿತಿ ಒದಗಿಸುವ ವ್ಯವಸ್ಥೆಯನ್ನು ಕಂಪನಿ ಅಳವಡಿಸಿಕೊಂಡಿದೆ. ಇದರಿಂದಾಗಿ ಗ್ರಾಹಕರು ಸ್ಪ್ಯಾಮ್ ಕರೆಗಳ ಕುರಿತು ಎಚ್ಚರಿಕೆಯಿಂದ ಇರಲಿದ್ದಾರೆ ಎಂಬುದು ಕಂಪನಿಯ ವಿಶ್ವಾಸವಾಗಿದೆ.
ಸ್ಪ್ಯಾಮ್ ಕರೆಗಳನ್ನು ಯಾರಾದರೂ ಮಾಡಿದರೆ, ಕೂಡಲೇ ಆ ಗ್ರಾಹಕರಿಗೆ ಮೇಸೇಜ್ ಕಳುಹಿಸುವ ವ್ಯವಸ್ಥೆಯನ್ನು ಮಾಡಲಾಗಿದೆ. ಎಐ ತಂತ್ರಜ್ಞಾನದ ಮೂಲಕ ಜನರಿಗೆ ಜಾಗೃತಿ ಮೂಡಿಸಲಾಗುತ್ತದೆ. ಅದರಲ್ಲೂ, ಕನ್ನಡ, ಹಿಂದಿ, ಬೆಂಗಾಲಿ, ಉರ್ದು, ಗುಜರಾತಿ, ತೆಲುಗು, ತಮಿಳು ಸೇರಿ ಆಯಾ ಪ್ರಾದೇಶಿಕ ಭಾಷೆಗಳಲ್ಲಿಯೇ ಜನರಿಗೆ ಎಸ್ಎಂಎಸ್ ಮೂಲಕ ಜಾಗೃತಿ ಮೂಡಿಸಲಾಗುತ್ತಿದೆ.
