ಕುಂಭ ಮೊನಾಲಿಸಾ ಬಳಿಕ ಇದೀಗ ಯಂಗ್ ಮೊನಾಲಿಸಾ; ಯಾರೀಕೆ?

ಪ್ರಯಾಗ್ರಾಜ್ ಮಹಾಕುಂಭಮೇಳದಲ್ಲಿ ರುದ್ರಾಕ್ಷಿ ಮಾರಾಟಗಾರ್ತಿ ಮೊನಾಲಿಸಾಳನ್ನು ನೆನಪಿಸುವ ಚಿಕ್ಕ ಹುಡುಗಿಯೊಬ್ಬಳ ವೀಡಿಯೊ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದೆ. ಉಜ್ಜಯಿನಿಯ ಒಂದು ದೇವಾಲಯದ ಬಳಿ ತಿಲಕ ಹಚ್ಚುತ್ತಿರುವ ಈ ಹುಡುಗಿಯನ್ನು ‘ಯಂಗ್ ಮೊನಾಲಿಸಾ’ ಎಂದು ಕರೆಯಲಾಗುತ್ತಿದೆ. 

ಕಂಟೆಂಟ್ ಕ್ರಿಯೇಟರ್ ಮನೋಜ್ ವೈಷ್ಣವ್ ಹಂಚಿಕೊಂಡ ಈ ವೀಡಿಯೊದಲ್ಲಿ, ಮೂವರು ಹುಡುಗಿಯರು ಅರಿಶಿನ-ಕುಂಕುಮದ ಬಟ್ಟಲುಗಳೊಂದಿಗೆ ದೇವಾಲಯದ ಹಿಂಬದಿಯಲ್ಲಿ ನಿಂತಿರುವುದು ಕಾಣಸಿಗುತ್ತದೆ. ನಂತರ ಕ್ಯಾಮೆರಾ ಮೊನಾಲಿಸಾಳನ್ನು ಹೋಲುವ ಚಿಕ್ಕ ಹುಡುಗಿಯತ್ತ ತಿರುಗಿದಾಗ, ಆಗಿನ ಹುಡುಗಿನ ಸಾಮ್ಯತೆ, ನೋಡುಗರನ್ನು ಅಚ್ಚರಿಗೆ ಬೀಳಿಸುತ್ತದೆ.  ಹುಡುಗಿಯೊಬ್ಬಳು “ನಾನು ನಿಮ್ಮ ಫೋನ್ ಒಡೆದುಹಾಕುತ್ತೇನೆ” ಎಂದು ಕೋಪದಿಂದ ಹೇಳುವ ದೃಶ್ಯವೂ ವೀಡಿಯೊದಲ್ಲಿದೆ. 

ಈ ವೀಡಿಯೊ ಮಾರ್ಚ್ 11ರಂದು ಪೋಸ್ಟ್ ಆಗಿ ಈವರೆಗೆ 2 ಲಕ್ಷಕ್ಕೂ ಹೆಚ್ಚು ಲೈಕ್​​ಗಳನ್ನು ಪಡೆದಿದೆ. ನೆಟಿಜನ್ಸ್​ “ನಿಜವಾಗಿಯೂ ಮೊನಾಲಿಸಾಳ ಪ್ರತಿರೂಪ!” ಎಂದು ಪ್ರತಿಕ್ರಿಯಿಸಿದ್ದಾರೆ. 

ಜನವರಿಯಲ್ಲಿ ಪ್ರಯಾಗ್ರಾಜ್ ಕುಂಭಮೇಳದಲ್ಲಿ ರುದ್ರಾಕ್ಷಿ ಮಾರಾಟ ಮಾಡುತ್ತಿದ್ದ ಇಂದೋರಿನ 16 ವರ್ಷದ ಮೊನಾಲಿಸಾ ಸೋಶಿಯಲ್ ಮೀಡಿಯಾ ಸೆನ್ಸೇಷನ್ ಆಗಿದ್ದಳು. ಆದರೆ ಈ ಪ್ರಸಿದ್ಧಿಯಿಂದ ಅವಳು ಮಾನಸಿಕ ಒತ್ತಡಕ್ಕೊಳಗಾಗಿದ್ದಳೆಂದು ವರದಿಯಾಗಿತ್ತು.