ಉಡುಪಿ : ಬಡವರ ಬುಲೆಟ್ ಎಂದೇ ಮೆಚ್ಚುಗೆ ಪಡೆದಿರುವ ಸ್ಪ್ಲೆಂಡರ್ ತನ್ನ ಸಾಮರ್ಥ್ಯವನ್ನ ಮತ್ತೆ ತೋರಿಸಿದೆ .ಜಿಲ್ಲೆಯ ಕಾರ್ಕಳ ತಾಲ್ಲೂಕಿನ ಪ್ರಜ್ವಲ್ ಶೆಣೈ ಹಳೆಯ ಹೀರೋ ಹೊಂಡಾ ಸ್ಪ್ಲೆಂಡರ್ ಬೈಕ್ನಲ್ಲಿ ಏಕಾಂಗಿಯಾಗಿ ಸುಮಾರು 5,500 ಕಿ.ಮೀ. ಪ್ರಯಾಣಿಸಿ ಮಾ. 30 ರಂದು ಶಿರ್ವಕ್ಕೆ ಹಿಂತಿರುಗಿದ್ದಾರೆ.
ಪ್ರಜ್ವಲ್ ಶೆಣೈ ತಮ್ಮ 26 ವರ್ಷ ಹಳೆಯ ಹೀರೋ ಸ್ಪ್ಲೆಂಡರ್ ಬೈಕ್ ಮೂಲಕ ಮಾ.10 ರಂದು ಶಿರ್ವದಿಂದ ಹೊರಟು ಹುಬ್ಬಳ್ಳಿ, ನಾಂದೇಡ್, ನಾಗ್ಪುರ, ಮಧ್ಯಪ್ರದೇಶ,ಜಬ್ಬಲ್ಪುರ ಮೂಲಕ ಉತ್ತರಪ್ರದೇಶದ ಅಯೋಧ್ಯಾ ರಾಮ ಮಂದಿರಕ್ಕೆ ಭೇಟಿ ನೀಡಿ ಅಲ್ಲಿಂದ ಸನೋಲಿ ಗಡಿ ದಾಟಿ ನೇಪಾಳ ದೇಶ ತಲುಪಿದ್ದಾರೆ. ನೇಪಾಳದ ರಾಜಧಾನಿ ಕಾಠ್ಮಂಡುವಿನ ಪಶುಪತಿನಾಥ ದೇಗುಲ, ಮುಷ್ಟಾಂಗ್ನ ಮುಕ್ತಿನಾಥ ದೇಗುಲ ಸಹಿತ 10 ದಿನಗಳಲ್ಲಿ ಸುಮಾರು 1,100 ಕಿ.ಮೀ. ಸಂಚರಿಸಿ ಅಲ್ಲಿನ ಪ್ರಸಿದ್ಧ ನಗರಗಳಿಗೆ ಭೇಟಿ ನೀಡಿದ್ದಾರೆ.ಪ್ರಯಾಣದುದ್ದಕ್ಕೂ ಬೈಕ್ನಲ್ಲಿ ಕನ್ನಡ ಬಾವುಟ ಹಾರಿಸಿ ತಮ್ಮ ಕನ್ನಡಾಭಿಮಾನ ಮೆರೆದಿದ್ದಾರೆ.
ಪ್ರಜ್ವಲ್ ಶೆಣೈ ಈವರೆಗೆ ದೇಶದ 17 ರಾಜ್ಯಗಳಲ್ಲಿ ಏಕಾಂಗಿಯಾಗಿ ಪ್ರಯಾಣಿಸಿ 5 ವರ್ಷಗಳಲ್ಲಿ ಸುಮಾರು 45,000 ದಿಂದ 50,000 ಕಿ.ಮೀ. ಕ್ರಮಿಸಿದ್ದು, ಇದೀಗ ಅದೇ ಹಳೆಯ ಬೈಕ್ ನಲ್ಲಿ ಸುಮಾರು 5,500 ಕಿ.ಮೀ. ಸಂಚರಿಸಿ ನೇಪಾಲ ದೇಶವನ್ನೂ ಪ್ರಯಾಣಿಸಿ ಬಂದಿದ್ದಾರೆ.26 ವರ್ಷದ ಹಳೆಯ ಬೈಕ್ ನಲ್ಲಿಉಡುಪಿಯ ಶಿರ್ವದಂತಹ ಗ್ರಾಮೀಣ ಭಾಗದಿಂದ ನೇಪಾಳದ ಮುಷ್ಟಾಂಗ್ ಪ್ರದೇಶಕ್ಕೆ ಬೆಳೆಸಿದ ಪ್ರಯಾಣವು ಸಾರ್ವಜನಿಕ ವಲಯದಲ್ಲಿ ಮೆಚ್ಚುಗೆಗೆ ಕಾರಣವಾಗಿದೆ.
ಇದನ್ನೂ ಓದಿ : ಉಡುಪಿ ಅತೀ ಶೀಘ್ರದಲ್ಲೇ ಪೂರ್ಣ ಸಾಕ್ಷರ ಜಿಲ್ಲೆ – ಘೋಷಣೆಯೊಂದೇ ಬಾಕಿ
