ಕುತ್ತಿಗೆ ಗಾಯ ಬಗ್ಗೆ ಮೊದಲ ಬಾರಿಗೆ ಮಾತನಾಡಿದ ಶುಭ್ಮನ್ ಗಿಲ್ : ಆಸ್ಪತ್ರೆ ಮತ್ತು ಪುನರ್ವಸತಿಯ ಸಂಕಷ್ಟದ ದಿನಗಳು!

ಕಟಕ್/ನವದೆಹಲಿ: ಸುಮಾರು ಒಂದು ತಿಂಗಳ ಕಾಲ ತಮ್ಮನ್ನು ಮೈದಾನದಿಂದ ದೂರವಿಟ್ಟಿದ್ದ ಕುತ್ತಿಗೆ ಗಾಯದ ಬಗ್ಗೆ ಭಾರತದ ಟಿ20 ಉಪನಾಯಕ ಶುಭ್ಮನ್ ಗಿಲ್ ಮೊದಲ ಬಾರಿಗೆ ವಿವರವಾಗಿ ಮಾತನಾಡಿದ್ದಾರೆ. ದಕ್ಷಿಣ ಆಫ್ರಿಕಾ ವಿರುದ್ಧದ ಟಿ20 ಸರಣಿಯ ಮೊದಲ ಪಂದ್ಯಕ್ಕೆ ಮುನ್ನ ಮಂಗಳವಾರ (ಡಿಸೆಂಬರ್ 9) ಮಾಧ್ಯಮದೊಂದಿಗೆ ಮಾತನಾಡಿದ ಗಿಲ್, ತಾವು ಎದುರಿಸಿದ ಸವಾಲುಗಳು ಮತ್ತು ಚೇತರಿಸಿಕೊಳ್ಳುವ ಪ್ರಕ್ರಿಯೆಯ ಬಗ್ಗೆ ಬೆಳಕು ಚೆಲ್ಲಿದ್ದಾರೆ.

ಏನಾಗಿತ್ತು ಗಾಯದ ಘಟನೆ?

ದಕ್ಷಿಣ ಆಫ್ರಿಕಾ ವಿರುದ್ಧ ಕೋಲ್ಕತ್ತದ ಈಡನ್ ಗಾರ್ಡನ್ಸ್‌ನಲ್ಲಿ ನವೆಂಬರ್ 15ರಂದು ನಡೆದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಗಿಲ್‌ಗೆ ಈ ಗಾಯ ಸಂಭವಿಸಿತ್ತು. ಪಂದ್ಯದ ಮೊದಲ ಇನಿಂಗ್ಸ್‌ನಲ್ಲಿ ಕೇವಲ ಮೂರು ಎಸೆತಗಳನ್ನು ಎದುರಿಸಿದ್ದ ಗಿಲ್, ಸೈಮನ್ ಹಾರ್ಮರ್ ಅವರ ಎಸೆತದ ಮೇಲೆ ಸ್ವೀಪ್ ಹೊಡೆತ ಆಡುವಾಗ ಕುತ್ತಿಗೆಯ ಸ್ನಾಯುಗಳಿಗೆ ತೀವ್ರ ತೊಂದರೆ ಆಯಿತು. ಆ ಬಳಿಕ ಅವರನ್ನು ತಕ್ಷಣವೇ ಆಸ್ಪತ್ರೆಗೆ ದಾಖಲಿಸಲಾಯಿತು.
ಈ ಗಾಯದ ಕಾರಣ ಗಿಲ್ ಗುವಾಹಟಿಯಲ್ಲಿ ನಡೆದ ಎರಡನೇ ಟೆಸ್ಟ್ ಹಾಗೂ ನಂತರದ ಮೂರು ಪಂದ್ಯಗಳ ಏಕದಿನ ಸರಣಿಯಿಂದ ಹೊರಗುಳಿದಿದ್ದರು. ನಂತರ ಅವರು ಬೆಂಗಳೂರಿನ ಕ್ರೀಡಾ ಉತ್ಕೃಷ್ಟತಾ ಕೇಂದ್ರದಲ್ಲಿ (CoE) ಪುನರ್ವಸತಿ ಕಾರ್ಯಕ್ರಮಕ್ಕೆ ಒಳಪಟ್ಟಿದ್ದರು. ವೈದ್ಯಕೀಯ ತಂಡದ ಅನುಮೋದನೆ ಪಡೆದ ನಂತರ ಈ ವಾರದ ಆರಂಭದಲ್ಲಿ ಅವರು ತಂಡಕ್ಕೆ ಮರಳಿದರು.

ಗಿಲ್ ಏನಂದರು?

ಮಾಧ್ಯಮದೊಂದಿಗೆ ಮಾತನಾಡಿದ ಗಿಲ್, “ನಾನು ಈಗ ಸಂಪೂರ್ಣ ಚೆನ್ನಾಗಿದ್ದೇನೆ. ಕೆಲವು ದಿನಗಳು CoE ಯಲ್ಲಿ ಕಳೆದೆ. ದೈಹಿಕವಾಗಿ ಮತ್ತು ಮಾನಸಿಕವಾಗಿ ಸಂಪೂರ್ಣ ಚೇತರಿಸಿಕೊಂಡಿದ್ದೇನೆ. ನನ್ನ ಕುತ್ತಿಗೆಯಲ್ಲಿ ಡಿಸ್ಕ್ ಬಲ್ಜ್ (ಕಶೇರುಖಂಡದ ಊತ) ಇತ್ತು, ಅದು ನನ್ನ ನರಗಳಿಗೆ ಒತ್ತಡ ಹಾಕುತ್ತಿತ್ತು. ಆ ದಿನ ಪಂದ್ಯ ಶುರುವಾಗುವ ಮೊದಲೇ ನನಗೆ ಸ್ನಾಯು ಸೆಳೆತ (Spasm) ಅಂತಹುದೇನೋ ಅನಿಸಿತ್ತು. ಆದರೆ ಪಂದ್ಯದಲ್ಲಿ ಆಡುವಾಗ ಕುತ್ತಿಗೆಗೆ ಹೆಚ್ಚಿನ ಒತ್ತಡವಾಯಿತು ಮತ್ತು ಬಲ್ಜ್ ನರಗಳಿಗೆ ತಾಗಿತು. ಅದರಿಂದಾಗಿ ನನಗೆ ಎರಡು ದಿನ ಆಸ್ಪತ್ರೆಯಲ್ಲಿ ಇರಬೇಕಾಯಿತು,” ಎಂದು ಸ್ಪಷ್ಟನೆ ನೀಡಿದರು.

ಪ್ರಮುಖ ಪಂದ್ಯಗಳಿಂದ ಹೊರಗುಳಿದುದು ನಿರಾಶಾದಾಯಕವಾಗಿತ್ತು ಎಂದು ಒಪ್ಪಿಕೊಂಡ ಗಿಲ್, ಆದರೆ ತಂಡ ಸರಿಯಾದ ದಿಕ್ಕಿನಲ್ಲಿ ಮುನ್ನಡೆಯುತ್ತಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು. “ಬದಿಯಲ್ಲಿ ಕುಳಿತು ನೋಡುತ್ತಿದ್ದೆ. ಟೆಸ್ಟ್ ಸರಣಿ ನಮಗೆ ಸರಿಯಾಗಿ ಹೋಗಲಿಲ್ಲ, ಆದರೆ ಏಕದಿನ ಸರಣಿಯಲ್ಲಿ ತಂಡ ಉತ್ತಮವಾಗಿ ಆಡಿತು. ಈಗ ಟಿ20ಯಲ್ಲಿ ಚೆನ್ನಾಗಿ ಆಡೋದು ನಮ್ಮ ಗುರಿ,” ಎಂದರು.

ವಿಶ್ವಕಪ್ ಮುನ್ನ 10 ಪಂದ್ಯಗಳು ನಿರ್ಣಾಯಕ

ಮುಂದಿನ ವರ್ಷ ಫೆಬ್ರವರಿ-ಮಾರ್ಚ್‌ನಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್‌ಗೆ ಮುನ್ನ ಭಾರತಕ್ಕೆ 10 ಪಂದ್ಯಗಳಿವೆ ಎಂಬುದನ್ನು ಗಿಲ್ ಗಮನಿಸಿದರು. “ವಿಶ್ವಕಪ್ ಶುರುವಾಗುವ ಮುನ್ನ ನಮಗೆ 10 ಟಿ20 ಪಂದ್ಯಗಳಿವೆ. ನಾವು ಸರಿಯಾದ ಲಯ ಮತ್ತು ಆವೇಗವನ್ನು ಕಂಡುಕೊಳ್ಳುತ್ತೇವೆ ಎಂದು ಭಾವಿಸುತ್ತೇನೆ. ವಿಶ್ವಕಪ್‌ನಲ್ಲಿ ನಾವು ಎದುರಿಸಬಹುದಾದ ವಿವಿಧ ಮೈದಾನಗಳಿಗೆ ಸೂಕ್ತವಾದ ಸಂಯೋಜನೆಗಳನ್ನು ಕಂಡುಕೊಳ್ಳುವುದು ನಮ್ಮ ಗುರಿ,” ಎಂದು ತಿಳಿಸಿದರು.

ಮೊದಲ ಪಂದ್ಯದಲ್ಲಿ ವೈಫಲ್ಯ

ಆದರೆ, ಕಟಕ್‌ನಲ್ಲಿ ನಡೆದ ಮೊದಲ ಟಿ20 ಪಂದ್ಯದಲ್ಲಿ ಗಿಲ್‌ಗೆ ಕಮ್‌ಬ್ಯಾಕ್ ಅಷ್ಟೊಂದು ಸುಲಭವಾಗಲಿಲ್ಲ. ಕೇವಲ ಎರಡು ಎಸೆತಗಳನ್ನು ಎದುರಿಸಿ 4 ರನ್‌ಗಳಿಸಿ ಮಾರ್ಕೊ ಜಾನ್ಸನ್‌ಗೆ ಕ್ಯಾಚ್ ನೀಡಿದರು. ಈ ವೈಫಲ್ಯದ ಬಳಿಕ ಅಭಿಮಾನಿಗಳಿಂದ ಅವರಿಗೆ ಟೀಕೆಗಳು ಎದುರಾಗಿವೆ.

ಗಿಲ್ ಟಿ20 ಕ್ರಿಕೆಟ್‌ನಲ್ಲಿ ಸ್ಥಿರತೆಗಾಗಿ ಹೆಣಗಾಡುತ್ತಿರುವುದು ವಾಸ್ತವ. ಸಂಜು ಸ್ಯಾಮ್ಸನ್ ಅವರನ್ನು ಕೆಳಕ್ರಮಾಂಕಕ್ಕೆ ತಳ್ಳಿದ್ದು, ಗಿಲ್ ಉಪನಾಯಕರಾಗಿ ತಮ್ಮ ಸ್ಥಾನವನ್ನು ಸಮರ್ಥಿಸಿಕೊಳ್ಳಬೇಕಾದ ಒತ್ತಡವನ್ನು ಹೆಚ್ಚಿಸಿದೆ. ಮುಂದಿನ ಪಂದ್ಯ ಗುರುವಾರ ಪಂಜಾಬ್‌ನ ಮುಲ್ಲನ್‌ಪುರದಲ್ಲಿ ನಡೆಯಲಿದ್ದು, ತವರು ನೆಲದಲ್ಲಿಯಾದರೂ ಗಿಲ್ ಕಾರ್ಯಪ್ರದರ್ಶನ ನೀಡಬಲ್ಲರೇ ಎಂಬುದು ಕುತೂಹಲದ ವಿಷಯವಾಗಿದೆ.
ಇದನ್ನೂ ಓದಿ : ಬಂಗಾಳ ‘ಬಾಬ್ರಿ’ ಮಸೀದಿ ವಿರುದ್ಧ ಪ್ರತಿಭಟನೆ : ಶೌಚಾಲಯಕ್ಕೆ ನಾಮಕರಣ ಯತ್ನ!