ರಾಂಚಿ: ಮುಖ್ಯ ಕೋಚ್ ಗೌತಮ್ ಗಂಭೀರ್ ಅವರ ‘ಮ್ಯೂಸಿಕಲ್ ಚೇರ್’ ಆಟ ಭಾರತೀಯ ಕ್ರಿಕೆಟ್ ತಂಡದಲ್ಲಿ ಇನ್ನೂ ಮುಂದುವರಿದಂತಿದೆ. ರಾಂಚಿ ಏಕದಿನ ಪಂದ್ಯದಲ್ಲಿ ರಿಷಬ್ ಪಂತ್ ಬದಲು ಋತುರಾಜ್ ಗಾಯಕ್ವಾಡ್ ಮತ್ತು ವಾಷಿಂಗ್ಟನ್ ಸುಂದರ್ ಅವರಿಗೆ ಅಚ್ಚರಿಯ ಬಡ್ತಿ ನೀಡಿದ್ದು ಈಗ ಚರ್ಚೆಗೆ ಗ್ರಾಸವಾಗಿದೆ. ಇವರಿಬ್ಬರ ವೈಫಲ್ಯದ ನಂತರ, ರಾಯ್ಪುರದಲ್ಲಿ ನಡೆಯಲಿರುವ ದಕ್ಷಿಣ ಆಫ್ರಿಕಾ ವಿರುದ್ಧದ 2ನೇ ಏಕದಿನ ಪಂದ್ಯದಲ್ಲಿ ಗಂಭೀರ್ ಮತ್ತೆ ಬ್ಯಾಟಿಂಗ್ ಕ್ರಮಾಂಕದಲ್ಲಿ ಅದಲು-ಬದಲು ಮಾಡುವ ಸಾಧ್ಯತೆಯಿದೆ.
ಗಾಯಕ್ವಾಡ್-ಸುಂದರ್ ವಿಫಲ ಪ್ರಯೋಗ
ರಾಂಚಿಯಲ್ಲಿ ಋತುರಾಜ್ ಗಾಯಕ್ವಾಡ್ (8 ರನ್) ಮತ್ತು ವಾಷಿಂಗ್ಟನ್ ಸುಂದರ್ (13 ರನ್) ನಿರೀಕ್ಷಿತ ಪ್ರದರ್ಶನ ನೀಡುವಲ್ಲಿ ಎಡವಿದರು. ಭಾರತ ಇನ್ನೂ ದೊಡ್ಡ ಮೊತ್ತ ಕಲೆಹಾಕಲು ಇವರ ವೈಫಲ್ಯವೂ ಒಂದು ಕಾರಣವಾಯಿತು. ಆರಂಭಿಕ ಆಟಗಾರರಾಗಿ ಗುರುತಿಸಿಕೊಂಡಿರುವ ಗಾಯಕ್ವಾಡ್ ಅವರನ್ನು ಮಧ್ಯಮ ಕ್ರಮಾಂಕದ 4ನೇ ಸ್ಥಾನದಲ್ಲಿ ಆಡಿಸಿದ್ದು ಮತ್ತು 5ನೇ ಕ್ರಮಾಂಕದಲ್ಲಿ ಉತ್ತಮ ದಾಖಲೆ ಹೊಂದಿರುವ ಕೆ.ಎಲ್. ರಾಹುಲ್ ಅವರನ್ನು 6ನೇ ಸ್ಥಾನಕ್ಕೆ ತಳ್ಳಿ, ವಾಷಿಂಗ್ಟನ್ ಸುಂದರ್ ಅವರನ್ನು 5ನೇ ಸ್ಥಾನದಲ್ಲಿ ಕಣಕ್ಕಿಳಿಸಿದ್ದು ಗಂಭೀರ್ ಅವರ ‘ವಿಚಿತ್ರ’ ತಂತ್ರಗಳಿಗೆ ಸಾಕ್ಷಿಯಾಯಿತು.
ರಿಷಬ್ ಪಂತ್ ಯಾಕಿಲ್ಲ?: ಆಕಾಶ್ ಚೋಪ್ರಾ ಪ್ರಶ್ನೆ
ಗಂಭೀರ್ ಅವರ ಈ ನಿರ್ಧಾರದ ಬಗ್ಗೆ ಮಾಜಿ ಕ್ರಿಕೆಟಿಗ ಆಕಾಶ್ ಚೋಪ್ರಾ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. “ರಿಷಬ್ ಪಂತ್ ಒಬ್ಬ ಪರಿಪೂರ್ಣ ಮಧ್ಯಮ ಕ್ರಮಾಂಕದ ಬ್ಯಾಟರ್. ಅವರನ್ನು ಬಿಟ್ಟು, ಆ ಕ್ರಮಾಂಕದಲ್ಲಿ ಅನುಭವವಿಲ್ಲದ ಇಬ್ಬರು ಆಟಗಾರರನ್ನು (ಗಾಯಕ್ವಾಡ್ ಮತ್ತು ಸುಂದರ್) ಆಡಿಸಿದ್ದು ಯಾಕೆ? ಕೆ.ಎಲ್. ರಾಹುಲ್ ಪಂತ್ ಆಡುತ್ತಾರೆ ಎಂದು ಹೇಳಿದ್ದರು, ಆದರೆ ಆಡಿಸಲಿಲ್ಲ,” ಎಂದು ಚೋಪ್ರಾ ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ಪ್ರಶ್ನಿಸಿದ್ದಾರೆ. ಶ್ರೇಯಸ್ ಐಯ್ಯರ್ ಅನುಪಸ್ಥಿತಿಯಲ್ಲಿ ತಿಲಕ್ ವರ್ಮಾ ಅವರಿಗೆ ಅವಕಾಶ ಸಿಗಬಹುದು ಎಂಬ ಲೆಕ್ಕಾಚಾರವೂ ಸುಳ್ಳಾಗಿದೆ.
ರಾಯ್ಪುರದಲ್ಲಿ ಏನಾಗಬಹುದು?
ಗಾಯಕ್ವಾಡ್ ಮತ್ತು ಸುಂದರ್ ಅವರನ್ನು ಕೈಬಿಟ್ಟು, ರಿಷಬ್ ಪಂತ್ ಅಥವಾ ತಿಲಕ್ ವರ್ಮಾ ಅವರಿಗೆ ಅವಕಾಶ ನೀಡುವ ಸಾಧ್ಯತೆಯನ್ನು ತಳ್ಳಿಹಾಕುವಂತಿಲ್ಲ. ರಾಂಚಿಯಲ್ಲಿ ದುಬಾರಿಯಾಗಿದ್ದ ಪ್ರಸಿದ್ಧ್ ಕೃಷ್ಣ ಬದಲಿಗೆ ನಿತೀಶ್ ಕುಮಾರ್ ರೆಡ್ಡಿ ಅಥವಾ ಮತ್ತೊಬ್ಬ ಬ್ಯಾಟರ್ ತಂಡ ಸೇರಿಕೊಳ್ಳಬಹುದು. ಗಂಭೀರ್ ಅವರ ತಂತ್ರಗಳು ಊಹೆಗೆ ನಿಲುಕದಾಗಿರುವುದರಿಂದ, ರಾಯ್ಪುರದಲ್ಲಿ ಯಾವ ಹೊಸ ಪ್ರಯೋಗ ನಡೆಯಲಿದೆ ಎಂಬುದು ಕುತೂಹಲ ಮೂಡಿಸಿದೆ. ಸ್ಥಿರತೆಗಿಂತ ಅಸ್ಥಿರತೆಯೇ ಗಂಭೀರ್ ಅವರ ಮಂತ್ರವಾಗಿರುವಂತೆ ಕಾಣುತ್ತಿದೆ.
ಇದನ್ನೂ ಓದಿ:ಗಂಭೀರ್ಗೆ ‘ಹ್ಯಾಂಡ್ಶೇಕ್’ ಕೊಡದೆ ಹೋದರಾ ಕೊಹ್ಲಿ? : ರಾಂಚಿ ಪಂದ್ಯದ ಬಳಿಕ ನಡೆದಿದ್ದೇನು?
