ನವದಹೆಲಿ: ಇಥಿಯೋಪಿಯಾದಲ್ಲಿನ ಹೈಲಿ ಗುಬ್ಬಿ ಜ್ವಾಲಾಮುಖಿಯು ಸುದೀರ್ಘ 12,000 ವರ್ಷಗಳ ನಂತರ ಭಾನುವಾರ ಸ್ಫೋಟಗೊಂಡಿದ್ದು, ಇದರ ಪರಿಣಾಮವೆಂಬಂತೆ, ಭಾರಿ ಪ್ರಮಾಣದ ಬೂದಿ ಮತ್ತು ಹೊಗೆಯ ಮೋಡವು ಬಾನಂಗಳದಲ್ಲಿ ಸುಮಾರು 14 ಕಿಲೋಮೀಟರ್ ಎತ್ತರದವರೆಗೆ ಚಿಮ್ಮಿದ್ದು, ಗಂಟೆಗೆ 100 ರಿಂದ 120 ಕಿಲೋಮೀಟರ್ ವೇಗದಲ್ಲಿ ಬೀಸುತ್ತಿರುವ ಗಾಳಿಯ ಮೂಲಕ ಭಾರತದತ್ತ ತೇಲಿ ಬಂದಿದೆ. ಈ ಜ್ವಾಲಾಮುಖಿ ಬೂದಿಯು ಈಗಾಗಲೇ ವಾಯು ಮಾಲಿನ್ಯದಿಂದ ತತ್ತರಿಸಿರುವ ದೆಹಲಿ ಸೇರಿದಂತೆ ಗುಜರಾತ್, ರಾಜಸ್ಥಾನ, ಹರಿಯಾಣ ಮತ್ತು ಪಂಜಾಬ್ ರಾಜ್ಯಗಳ ವಾಯುಮಂಡಲವನ್ನು ಪ್ರವೇಶಿಸಿದೆ.
ಇಥಿಯೋಪಿಯಾದ ಅಫಾರ್ ಪ್ರದೇಶದಲ್ಲಿರುವ ಹೈಲಿ ಗುಬ್ಬಿ ಜ್ವಾಲಾಮುಖಿಯು ಹೋಲೋಸೀನ್ ಯುಗದ ನಂತರ (ಸುಮಾರು 12,000 ವರ್ಷಗಳ ಹಿಂದಿನ ಹಿಮಯುಗದ ಅಂತ್ಯದ ನಂತರ) ಇದೇ ಮೊದಲ ಬಾರಿಗೆ ಭಾನುವಾರ ಬೆಳಿಗ್ಗೆ ಸ್ಫೋಟಗೊಂಡಿದೆ. ರಿಫ್ಟ್ ಕಣಿವೆಯ ಒಳಗೆ ಇರುವ ಈ ಜ್ವಾಲಾಮುಖಿಯು ಸಮುದ್ರ ಮಟ್ಟದಿಂದ ಸುಮಾರು 500 ಮೀಟರ್ ಎತ್ತರದಲ್ಲಿದೆ. ಸ್ಫೋಟದ ತೀವ್ರತೆ ಎಷ್ಟಿತ್ತೆಂದರೆ, ಸ್ಥಳೀಯರು ಇದನ್ನು ಬಾಂಬ್ ಸ್ಫೋಟದಂತಹ ಭಾರಿ ಶಬ್ದ ಮತ್ತು ಆಘಾತಕಾರಿ ಅಲೆ ಎಂದು ಬಣ್ಣಿಸಿದ್ದಾರೆ. ಈ ಪ್ರದೇಶವು ಭೂಕಂಪನ ವಲಯದಲ್ಲಿದ್ದು, ಎರಡು ಟೆಕ್ಟೋನಿಕ್ ಪ್ಲೇಟ್ಗಳು ಸಂಧಿಸುವ ಜಾಗದಲ್ಲಿ ಈ ನೈಸರ್ಗಿಕ ವಿಕೋಪ ಸಂಭವಿಸಿದೆ.
ಭಾರತದತ್ತ ತೇಲಿ ಬಂದ ಬೂದಿಯ ಮೋಡ
ಜ್ವಾಲಾಮುಖಿಯಿಂದ ಚಿಮ್ಮಿದ ಬೂದಿಯು ವಾತಾವರಣದ ಮೇಲ್ಮೈಯಲ್ಲಿ ಶೇಖರಣೆಯಾಗಿದ್ದು, ಬಲವಾದ ಗಾಳಿಯು ಇದನ್ನು ಇಥಿಯೋಪಿಯಾದಿಂದ ಕೆಂಪು ಸಮುದ್ರ, ಯೆಮೆನ್ ಮತ್ತು ಓಮನ್ ಮೂಲಕ ಅರಬ್ಬೀ ಸಮುದ್ರದ ಮಾರ್ಗವಾಗಿ ಪಶ್ಚಿಮ ಮತ್ತು ಉತ್ತರ ಭಾರತದತ್ತ ತಳ್ಳಿದೆ. ಈ ಬೂದಿಯ ಮೋಡದಲ್ಲಿ ಸಲ್ಫರ್ ಡೈ ಆಕ್ಸೈಡ್ (SO2) ಮತ್ತು ಜ್ವಾಲಾಮುಖಿಯ ಬೂದಿ ಮಿಶ್ರಿತವಾಗಿದೆ ಎಂದು ಹವಾಮಾನ ತಜ್ಞರು ತಿಳಿಸಿದ್ದಾರೆ. ದೆಹಲಿ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಿಗೆ ತಲುಪಿರುವ ಈ ಬೂದಿಯು ಭೂಮಿಯ ಮೇಲ್ಮೈಯಲ್ಲಿರುವ ಗಾಳಿಯ ಗುಣಮಟ್ಟದ ಮೇಲೆ ನೇರ ಪರಿಣಾಮ ಬೀರುವುದಿಲ್ಲವಾದರೂ, ವಾತಾವರಣದ ಮೇಲ್ಭಾಗದಲ್ಲಿ ಆವರಿಸಿಕೊಂಡಿದೆ.
ವಿಮಾನ ಸಂಚಾರಕ್ಕೆ ಅಡ್ಡಿ ಮತ್ತು ಮುನ್ನೆಚ್ಚರಿಕೆ ಕ್ರಮಗಳು
ಜ್ವಾಲಾಮುಖಿ ಬೂದಿಯು ವಿಮಾನಗಳ ಇಂಜಿನ್ಗಳಿಗೆ ಹಾನಿಯುಂಟುಮಾಡುವ ಸಾಧ್ಯತೆ ಇರುವುದರಿಂದ, ವಿಮಾನಯಾನ ಸಚಿವಾಲಯ ಮತ್ತು ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (DGCA) ಅಲರ್ಟ್ ಘೋಷಿಸಿವೆ. ಈ ಹಿನ್ನೆಲೆಯಲ್ಲಿ ಏರ್ ಇಂಡಿಯಾ, ಇಂಡಿಗೋ ಮತ್ತು ಸ್ಪೈಸ್ಜೆಟ್ ಸೇರಿದಂತೆ ಹಲವು ವಿಮಾನಯಾನ ಸಂಸ್ಥೆಗಳು ತಮ್ಮ ಕಾರ್ಯಾಚರಣೆಯಲ್ಲಿ ಬದಲಾವಣೆ ಮಾಡಿಕೊಂಡಿವೆ. ಮುನ್ನೆಚ್ಚರಿಕೆ ಕ್ರಮವಾಗಿ ಏರ್ ಇಂಡಿಯಾ 11 ವಿಮಾನಗಳನ್ನು ರದ್ದುಗೊಳಿಸಿದ್ದು, ನ್ಯೂಯಾರ್ಕ್-ದೆಹಲಿ, ದುಬೈ-ಹೈದರಾಬಾದ್, ಮತ್ತು ದೋಹಾ-ಮುಂಬೈ ಮಾರ್ಗಗಳ ವಿಮಾನಗಳು ಇದರಲ್ಲಿ ಸೇರಿವೆ. ವಿಮಾನಗಳು ಹಾರಾಟ ನಡೆಸುವ ಮಾರ್ಗಗಳಲ್ಲಿ ಬೂದಿಯ ಪ್ರಮಾಣವನ್ನು ಪರಿಶೀಲಿಸಿ ನಂತರವೇ ಸಂಚಾರ ನಡೆಸಲು ಸೂಚಿಸಲಾಗಿದೆ.
ಮುಂದೇನು?
ಭಾರತೀಯ ಹವಾಮಾನ ಇಲಾಖೆ (IMD) ನೀಡಿರುವ ಮಾಹಿತಿಯ ಪ್ರಕಾರ, ಈ ಬೂದಿಯ ಮೋಡವು ಚೀನಾದ ಕಡೆಗೆ ಚಲಿಸುತ್ತಿದ್ದು, ಸಂಜೆಯ ವೇಳೆಗೆ ಭಾರತದ ವಾಯುಪ್ರದೇಶದಿಂದ ದೂರ ಸರಿಯುವ ನಿರೀಕ್ಷೆಯಿದೆ. ನೇಪಾಳದ ಗುಡ್ಡಗಾಡು ಪ್ರದೇಶಗಳು, ಹಿಮಾಲಯ ಮತ್ತು ಉತ್ತರ ಪ್ರದೇಶದ ಟೆರೈ ಬೆಲ್ಟ್ ಭಾಗಗಳಲ್ಲಿ ಸಲ್ಫರ್ ಡೈ ಆಕ್ಸೈಡ್ ಮಟ್ಟದಲ್ಲಿ ಏರಿಕೆಯಾಗುವ ಸಾಧ್ಯತೆಯಿದೆ ಎಂದು ತಜ್ಞರು ಅಂದಾಜಿಸಿದ್ದಾರೆ. ಸದ್ಯಕ್ಕೆ ಪರಿಸ್ಥಿತಿಯನ್ನು ಸೂಕ್ಷ್ಮವಾಗಿ ಗಮನಿಸಲಾಗುತ್ತಿದ್ದು, ಪ್ರಯಾಣಿಕರ ಸುರಕ್ಷತೆಗೆ ಆದ್ಯತೆ ನೀಡಲಾಗಿದೆ ಎಂದು ವಿಮಾನಯಾನ ಸಂಸ್ಥೆಗಳು ಸ್ಪಷ್ಟಪಡಿಸಿವೆ
ಇದನ್ನೂ ಓದಿ; ‘ಧರ್ಮಧ್ವಜ’ ಸ್ಥಾಪನೆಗೆ ಅಯೋಧ್ಯೆ ಸಜ್ಜು | ಮರ್ಯಾದಾ ಪುರುಷೋತ್ತಮನ ಮನೆ ಮೇಲೆ ಹಾರಲಿದೆ ಕೇಸರಿ ಧ್ವಜ
