ಚರ್ಮ ಕೊಳೆತು, ಅಂಗಗಳನ್ನು ಕತ್ತರಿಸುವ ಸ್ಥಿತಿ: ಅಮೆರಿಕವನ್ನು ಬೆಚ್ಚಿಬೀಳಿಸುತ್ತಿದೆ ‘ಝೋಂಬಿ’ ಡ್ರಗ್ ಝೈಲಜಿನ್‌

ವಾಷಿಂಗ್ಟನ್: ಅಮೆರಿಕದಾದ್ಯಂತ ‘ಟ್ರಾನ್ಕ್’ (Tranq) ಅಥವಾ ‘ಝೋಂಬಿ ಡ್ರಗ್’ ಎಂದು ಕರೆಯಲ್ಪಡುವ ಝೈಲಜಿನ್ (Xylazine) ಎಂಬ ಪ್ರಾಣಿಗಳ ಪ್ರಜ್ಞಾನಾಶಕ ಔಷಧವು ಭಾರೀ ಅನಾಹುತವನ್ನು ಸೃಷ್ಟಿಸುತ್ತಿದೆ. ಮಿತಿಮೀರಿದ ಸೇವನೆಯಿಂದ ಸಾವುಗಳು ಮತ್ತು ಗಂಭೀರ ಆರೋಗ್ಯ ಬಿಕ್ಕಟ್ಟುಗಳಿಗೆ ಕಾರಣವಾಗುತ್ತಿರುವ ಈ ಔಷಧದ ಬಳಕೆಯು, ಚರ್ಮ ಕೊಳೆತು ಹೋಗುವಂತೆ ಮಾಡಿ ಅಂಗಗಳನ್ನು ಕತ್ತರಿಸುವಂತಹ ಭೀಕರ ಪರಿಣಾಮಗಳಿಗೆ ಕಾರಣವಾಗುತ್ತಿದೆ ಎಂದು ಅಮೆರಿಕದ ವೈದ್ಯರೊಬ್ಬರು ಎಚ್ಚರಿಸಿದ್ದಾರೆ.

ಈ ಔಷಧವನ್ನು ಸಾಮಾನ್ಯವಾಗಿ ಫೆಂಟನಿಲ್ (fentanyl) ಎಂಬ ಮತ್ತೊಂದು ಅಪಾಯಕಾರಿ ಔಷಧದೊಂದಿಗೆ ಬೆರೆಸಿ, ಅದರ ಪರಿಣಾಮವನ್ನು ಹೆಚ್ಚಿಸಲು ಮತ್ತು ದೀರ್ಘಕಾಲ ಉಳಿಸಿಕೊಳ್ಳಲು ಬಳಸಲಾಗುತ್ತದೆ. 2023ರಲ್ಲಿ, ಅಮೆರಿಕದ ಔಷಧ ಜಾರಿ ನಿರ್ದೇಶನಾಲಯ ಪರೀಕ್ಷಿಸಿದ ಫೆಂಟನಿಲ್ ಪುಡಿಯ ಶೇ.30ರಷ್ಟು ಮಾದರಿಗಳಲ್ಲಿ ಮತ್ತು ಫೆಂಟನಿಲ್ ಮಾತ್ರೆಗಳ ಶೇ. 6ರಷ್ಟು ಮಾದರಿಗಳಲ್ಲಿ ಝೈಲಜಿನ್ ಪತ್ತೆಯಾಗಿದೆ. ಈ ಸಾಂಕ್ರಾಮಿಕದ ಕೇಂದ್ರಬಿಂದು ಎಂದು ಪರಿಗಣಿಸಲಾದ ಫಿಲಡೆಲ್ಫಿಯಾದಲ್ಲಿ, ಆ ವರ್ಷ ಸಂಭವಿಸಿದ ಉದ್ದೇಶಪೂರ್ವಕವಲ್ಲದ ಮಿತಿಮೀರಿದ ಸೇವನೆಯ ಸಾವುಗಳಲ್ಲಿ ಶೇ. 38ರಷ್ಟು ಪ್ರಕರಣಗಳಿಗೆ ಇದೇ ಡ್ರಗ್ ಕಾರಣವಾಗಿತ್ತು.

ಫಿಲಡೆಲ್ಫಿಯಾದ ಮೂಳೆ ಶಸ್ತ್ರಚಿಕಿತ್ಸಕರಾದ ಡಾ. ಆಸಿಫ್ ಇಲ್ಯಾಸ್, “ಐದು ವರ್ಷಗಳ ಹಿಂದೆ ಝೈಲಜಿನ್ ಸಂಬಂಧಿತ ಯಾವುದೇ ರೋಗಿಗಳು ಕಾಣಿಸಿಕೊಂಡಿರಲಿಲ್ಲ. ಆದರೆ ಈಗ ಫಿಲಡೆಲ್ಫಿಯಾದ ದೊಡ್ಡ ಆಸ್ಪತ್ರೆಗಳಲ್ಲಿ ಪ್ರತಿದಿನ ಅಥವಾ ಪ್ರತಿ ವಾರ ಇಂತಹ ರೋಗಿಗಳನ್ನು ನಾವು ನೋಡುತ್ತಿದ್ದೇವೆ,” ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.

“ಏನಿದು ಝೈಲಜಿನ್”?
ಝೈಲಜಿನ್ ಅನ್ನು 1962ರಲ್ಲಿ ಬೇಯರ್ ಕಂಪನಿಯು ರಕ್ತದೊತ್ತಡದ ಔಷಧವಾಗಿ ಸಂಶ್ಲೇಷಿಸಿತ್ತು. ಆದರೆ ತೀವ್ರ ಅಡ್ಡಪರಿಣಾಮಗಳಿಂದಾಗಿ, ಇದನ್ನು ಪಶುವೈದ್ಯಕೀಯ ಬಳಕೆಗೆ ಸೀಮಿತಗೊಳಿಸಲಾಯಿತು. ನಂತರ 2000ರ ದಶಕದ ಆರಂಭದಲ್ಲಿ ಇದು ಪೋರ್ಟೊ ರಿಕೊದಲ್ಲಿ ಬೀದಿ ಔಷಧವಾಗಿ (street drug) ಹೊರಹೊಮ್ಮಿತು. ಇದನ್ನು ಚುಚ್ಚುಮದ್ದು ಮೂಲಕ ತೆಗೆದುಕೊಂಡಾಗ, ಇದು ಸ್ನಾಯುಗಳನ್ನು ಸಡಿಲಗೊಳಿಸಿ, ನೋವನ್ನು ನಿವಾರಿಸಿ, ವ್ಯಕ್ತಿಯನ್ನು ‘ಝೋಂಬಿ’ಯಂತಹ ಸ್ಥಿತಿಗೆ ತಳ್ಳುತ್ತದೆ.

“ಝೈಲಜಿನ್‌ನ ಅಪಾಯಕಾರಿ ಪರಿಣಾಮಗಳು”
ಝೈಲಜಿನ್ ಹೃದಯ ಬಡಿತವನ್ನು ಅಪಾಯಕಾರಿ ಮಟ್ಟಕ್ಕೆ ನಿಧಾನಗೊಳಿಸುತ್ತದೆ, ರಕ್ತದೊತ್ತಡವನ್ನು ಕಡಿಮೆ ಮಾಡುತ್ತದೆ ಮತ್ತು ಉಸಿರಾಟದ ತೊಂದರೆಗಳನ್ನು ಉಂಟುಮಾಡುತ್ತದೆ. ಅಷ್ಟೇ ಅಲ್ಲದೆ, ಇದು ರಕ್ತನಾಳಗಳನ್ನು ಸಂಕುಚಿತಗೊಳಿಸುತ್ತದೆ. ಇದರಿಂದಾಗಿ ಚರ್ಮದ ಅಂಗಾಂಶಗಳಿಗೆ ರಕ್ತ ಮತ್ತು ಆಮ್ಲಜನಕದ ಪೂರೈಕೆ ಕಡಿಮೆಯಾಗಿ, ಚರ್ಮ ಕೊಳೆಯಲು ಆರಂಭವಾಗುತ್ತದೆ. ಈ ಗಾಯಗಳು ಮಾಂಸ ತಿನ್ನುವ ಬ್ಯಾಕ್ಟೀರಿಯಾದ ಸೋಂಕಿನಂತೆ ಕಾಣಿಸಬಹುದು ಮತ್ತು ಅಂತಿಮವಾಗಿ ಪೀಡಿತ ಕೈ ಅಥವಾ ಕಾಲುಗಳನ್ನು ಕತ್ತರಿಸುವ ಅನಿವಾರ್ಯತೆ ಎದುರಾಗಬಹುದು. ಕೆಲವು ಸಂದರ್ಭಗಳಲ್ಲಿ, ಅಂಗಾಂಶಗಳು ಸಂಪೂರ್ಣವಾಗಿ ಸತ್ತುಹೋಗಿ, ಮೂಳೆಗಳು ಕಾಣಿಸುವ ಮಟ್ಟಕ್ಕೆ ತಲುಪಬಹುದು.

“ರೋಗಿಗಳು ಚಿಕಿತ್ಸೆ ಪೂರ್ಣಗೊಳ್ಳುವ ಮೊದಲೇ ಆಸ್ಪತ್ರೆಗಳಿಂದ ಹೊರನಡೆಯುವುದು ಒಂದು ದೊಡ್ಡ ಸವಾಲಾಗಿದೆ. ನಾವು ಶಸ್ತ್ರಚಿಕಿತ್ಸೆ ಮೂಲಕ ಈ ಗಾಯಗಳನ್ನು ಸರಿಪಡಿಸಲು ಪ್ರಯತ್ನಿಸಬಹುದು, ಆದರೆ ವ್ಯಕ್ತಿಯು ಮತ್ತೆ ಡ್ರಗ್ ಚುಚ್ಚುಮದ್ದು ತೆಗೆದುಕೊಳ್ಳಲು ಪ್ರಾರಂಭಿಸಿದರೆ, ನಮ್ಮೆಲ್ಲಾ ಪ್ರಯತ್ನ ವ್ಯರ್ಥವಾಗುತ್ತದೆ,” ಎಂದು ಡಾ. ಇಲ್ಯಾಸ್ ಹೇಳುತ್ತಾರೆ.

ಆದಾಗ್ಯೂ, ಝೈಲಜಿನ್ ಚಟಕ್ಕೆ ಚಿಕಿತ್ಸೆ ಸಾಧ್ಯವಿದೆ. ಟ್ರೇಸಿ ಮೆಕ್‌ಕಾನ್ ಎಂಬ ಮಹಿಳೆ, 45 ದಿನಗಳ ಪುನರ್ವಸತಿ ಕಾರ್ಯಕ್ರಮದ ನಂತರ ಈ ಚಟದಿಂದ ಹೊರಬಂದು, ಈಗ ಸಾಮಾಜಿಕ ಮಾಧ್ಯಮದಲ್ಲಿ ತಮ್ಮ ಅನುಭವವನ್ನು ಹಂಚಿಕೊಳ್ಳುತ್ತಾ ಝೈಲಜಿನ್‌ನ ಅಪಾಯಗಳ ಬಗ್ಗೆ ಜಾಗೃತಿ ಮೂಡಿಸುತ್ತಿದ್ದಾರೆ.