ಲಾಹೋರ್ : ಪಾಕಿಸ್ತಾನ ಮತ್ತು ದಕ್ಷಿಣ ಆಫ್ರಿಕಾ ನಡುವಿನ ಮೊದಲ ಟೆಸ್ಟ್ ಪಂದ್ಯದ ನೇರ ಪ್ರಸಾರದ ವೇಳೆ, ದಕ್ಷಿಣ ಆಫ್ರಿಕಾದ ಮಾಜಿ ಆಲ್ರೌಂಡರ್ ಹಾಗೂ ಖ್ಯಾತ ಕಾಮೆಂಟೇಟರ್ ಶಾನ್ ಪೊಲಾಕ್ ಅವರು ಮಾಡಿದ ಎಡವಟ್ಟಿನಿಂದಾಗಿ, ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆ ಮತ್ತು ತಮಾಷೆಯ ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. ಪಾಕಿಸ್ತಾನದ ಟೆಸ್ಟ್ ನಾಯಕ ಶಾನ್ ಮಸೂದ್ ಅವರನ್ನು “ಭಾರತದ ನಾಯಕ” ಎಂದು ಪೊಲಾಕ್ ತಪ್ಪಾಗಿ ಸಂಬೋಧಿಸಿದ್ದೇ ಅದಕ್ಕೆ ಕಾರಣ.
ಲಾಹೋರ್ನ ಗಡಾಫಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದ ಮೊದಲ ದಿನದಂದು ಈ ಘಟನೆ ನಡೆದಿದೆ. ಪಾಕಿಸ್ತಾನದ ಮೊದಲ ಇನ್ನಿಂಗ್ಸ್ನ 39ನೇ ಓವರ್ ಮುಗಿದ ನಂತರ, ಪ್ರೇಕ್ಷಕರ ಗ್ಯಾಲರಿಯಲ್ಲಿದ್ದ ಅಭಿಮಾನಿಯೊಬ್ಬರು “ಕಿಂಗ್ ಬಾಬರ್” ಎಂಬ ಬ್ಯಾನರ್ ಹಿಡಿದಿರುವುದನ್ನು ಪೊಲಾಕ್ ಗಮನಿಸಿದರು. ತಮ್ಮ ನೆಚ್ಚಿನ ಆಟಗಾರ ಬಾಬರ್ ಆಝಮ್ ಅವರು ಬ್ಯಾಟಿಂಗ್ಗೆ ಬರುವುದನ್ನು ನೋಡಲು, ಸ್ವತಃ ತಮ್ಮ ದೇಶದ ನಾಯಕನೇ ಔಟಾಗಲಿ ಎಂದು ಪ್ರೇಕ್ಷಕರು ಬಯಸುತ್ತಿರುವುದಕ್ಕೆ ಅವರು ಆಶ್ಚರ್ಯ ವ್ಯಕ್ತಪಡಿಸಿದರು.
ಆದರೆ, ಈ ಸಂದರ್ಭದಲ್ಲಿ ಮಾತನಾಡಿದ ಪೊಲಾಕ್, “ಅವರು (ಪ್ರೇಕ್ಷಕರು) ಅಸಮಾಧಾನಗೊಂಡಿದ್ದಕ್ಕೆ ಇದೇ ಕಾರಣ. ಬಾಬರ್ ಅವರನ್ನು ಕ್ರೀಸ್ಗೆ ತರಲು, ಭಾರತದ ನಾಯಕ ಶಾನ್ ಮಸೂದ್ ಔಟಾಗಬೇಕೆಂದು ಅವರು ಬಯಸುತ್ತಾರೆ ಎಂಬುದನ್ನು ನಂಬಲು ನನಗೆ ಸಾಧ್ಯವಾಗುತ್ತಿಲ್ಲ,” ಎಂದು ಹೇಳಿದರು. ಈ ಪ್ರಮಾದದ ವಿಡಿಯೋ ಕ್ಲಿಪ್ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಪಂದ್ಯದಲ್ಲಿ, ಶಾನ್ ಮಸೂದ್ ಅವರು 76 ರನ್ಗಳಿಸಿ ಔಟಾದರು. ನಂತರ ಕ್ರೀಸ್ಗೆ ಬಂದ ಬಾಬರ್ ಆಝಮ್ ಅವರಿಗೆ ಪ್ರೇಕ್ಷಕರಿಂದ ಭರ್ಜರಿ ಸ್ವಾಗತ ದೊರೆಯಿತು. ಆದರೆ, ಬಾಬರ್ ಅವರು ಕೇವಲ 23 ರನ್ಗಳಿಗೆ ಔಟಾಗಿ ನಿರಾಸೆ ಮೂಡಿಸಿದರು. ಮೊದಲ ದಿನದಂತ್ಯಕ್ಕೆ ಪಾಕಿಸ್ತಾನವು ಮೊಹಮ್ಮದ್ ರಿಝ್ವಾನ್ (62*) ಮತ್ತು ಸಲ್ಮಾನ್ ಅಘಾ (52*) ಅವರ ಅಜೇಯ ಶತಕದ ಜೊತೆಯಾಟದ ನೆರವಿನಿಂದ 5 ವಿಕೆಟ್ ನಷ್ಟಕ್ಕೆ 313 ರನ್ಗಳಿಸಿ ಉತ್ತಮ ಸ್ಥಿತಿಯಲ್ಲಿದೆ.
