ನವದೆಹಲಿ: ಜಪಾನ್‌ನ ಪ್ರಮುಖ ದ್ವಿಚಕ್ರ ವಾಹನ ತಯಾರಕ ಕಂಪನಿ ಹೋಂಡಾ ಮೋಟಾರ್‌ಸೈಕಲ್ ಆಂಡ್ ಸ್ಕೂಟರ್ ಇಂಡಿಯಾ (HMSI), ತನ್ನ ಬಹುನಿರೀಕ್ಷಿತ ಕ್ರೂಸರ್ ಬೈಕ್ ‘ಹೋಂಡಾ ರೆಬೆಲ್ 500” ಅನ್ನು (Honda Rebel 500) ಭಾರತೀಯ ಮಾರುಕಟ್ಟೆಯಲ್ಲಿ ಅಧಿಕೃತವಾಗಿ ಬಿಡುಗಡೆ ಮಾಡಿದೆ. ಈ ಬೈಕಿನ ಎಕ್ಸ್-ಶೋರೂಂ (ಗುರಗಾಂವ್) ಬೆಲೆಯು 5.12 ಲಕ್ಷ ರೂಪಾಯಿಯಿಂದ ಪ್ರಾರಂಭವಾಗುತ್ತದೆ.
ರೆಟ್ರೊ-ಮಾಡರ್ನ್ ವಿನ್ಯಾಸ, ಶಕ್ತಿಶಾಲಿ ಎಂಜಿನ್ ಮತ್ತು ಆಕರ್ಷಕ ನೋಟದೊಂದಿಗೆಈ ಬೈಕ್ ಕ್ರೂಸರ್ ವಿಭಾಗದಲ್ಲಿ ಹೊಸ ಸಂಚಲನ ಮೂಡಿಸುವ ನಿರೀಕ್ಷೆಯಿದೆ. ಹೋಂಡಾ ರೆಬೆಲ್ 500, ತನ್ನ ‘ಬಾಬರ್’ ಶೈಲಿಯ ವಿನ್ಯಾಸದಿಂದ ಗಮನ ಸೆಳೆಯುತ್ತದೆ. ಕಪ್ಪು ಬಣ್ಣದ ಫಿನಿಶ್, ದಪ್ಪನೆಯ ಟೈರ್‌ಗಳು ಮತ್ತು ವಿಶಿಷ್ಟವಾದ ಇಂಧನ ಟ್ಯಾಂಕ್ ಇದರ ಆಕರ್ಷಣೆಯನ್ನು ಹೆಚ್ಚಿಸಿವೆ. ಭಾರತದಲ್ಲಿ ಸದ್ಯಕ್ಕೆ ‘ಮ್ಯಾಟ್ ಗನ್‌ಪೌಡರ್ ಬ್ಲಾಕ್ ಮೆಟಾಲಿಕ್’ ಎಂಬ ಒಂದೇ ಬಣ್ಣದ ಆಯ್ಕೆಯಲ್ಲಿ ಇದು ಲಭ್ಯವಾಗಲಿದೆ.
ಎಂಜಿನ್ ವಿಭಾಗದಲ್ಲಿ, ರೆಬೆಲ್ 500, 471cc ಲಿಕ್ವಿಡ್-ಕೂಲ್ಡ್, ಪ್ಯಾರಲಲ್-ಟ್ವಿನ್ ಎಂಜಿನ್‌ನಿಂದ ಶಕ್ತಿ ಪಡೆಯುತ್ತದೆ. ಈ ಎಂಜಿನ್ 8,500 rpm ನಲ್ಲಿ 46 bhp ಪವರ್ ಮತ್ತು 6,000 rpm ನಲ್ಲಿ 43.3 Nm ಟಾರ್ಕ್ ಉತ್ಪಾದಿಸುತ್ತದೆ. 6-ಸ್ಪೀಡ್ ಗೇರ್‌ಬಾಕ್ಸ್‌ ಇದರಲ್ಲಿದೆ. 690mm ನಷ್ಟು ಎತ್ತರದ ಸೀಟ್ಗಳು ನಾನಾ ಎತ್ತರದ ಸವಾರರಿಗೂ ಆರಾಮದಾಯಕ ಚಾಲನಾ ಅನುಭವವನ್ನು ನೀಡುತ್ತದೆ.
ಪ್ರಮುಖ ಫೀಚರ್ಗಳು
- * ಸಂಪೂರ್ಣ ಎಲ್‌ಇಡಿ ಲೈಟಿಂಗ್ ವ್ಯವಸ್ಥೆ (ಹೆಡ್‌ಲ್ಯಾಂಪ್ ಮತ್ತು ಟೇಲ್ ಲೈಟ್)
- * ನೆಗೆಟಿವ್ ಎಲ್‌ಸಿಡಿ ಇನ್‌ಸ್ಟ್ರುಮೆಂಟ್ ಕ್ಲಸ್ಟರ್
- * ಸುರಕ್ಷತೆಗಾಗಿ ಡ್ಯುಯಲ್-ಚಾನೆಲ್ ಎಬಿಎಸ್, ಮುಂಭಾಗ 296mm ಮತ್ತು ಹಿಂಭಾಗ 240mm ಡಿಸ್ಕ್ ಬ್ರೇಕ್‌ಗಳು
- * ಮುಂಭಾಗದಲ್ಲಿ ಟೆಲಿಸ್ಕೋಪಿಕ್ ಫೋರ್ಕ್‌ಗಳು ಮತ್ತು ಹಿಂಭಾಗದಲ್ಲಿ ಶೋವಾ ಟ್ವಿನ್ ಶಾಕ್ ಅಬ್ಸಾರ್ಬರ್‌ಗಳ ಸಸ್ಪೆನ್ಷನ್
- * 11.2 ಲೀಟರ್ ಸಾಮರ್ಥ್ಯದ ಇಂಧನ ಟ್ಯಾಂಕ್ ಮತ್ತು 191 ಕೆ.ಜಿ ಕರ್ಬ್ ತೂಕ
ಈ ಬೈಕ್ ಅನ್ನು ಕಂಪ್ಲೀಟ್ ಬಿಲ್ಟ್-ಅಪ್ ಯೂನಿಟ್ (CBU) ಮಾರ್ಗದ ಮೂಲಕ ಭಾರತಕ್ಕೆ ಆಮದು ಮಾಡಿಕೊಳ್ಳಲಾಗುತ್ತಿದ್ದು, ಹೋಂಡಾದ ಮತ್ತೊಂದು 500cc ಬೈಕ್ ಆದ NX500 ಗಿಂತ ರೂ. 78,000 ಕಡಿಮೆ ಬೆಲೆ ಹೊಂದಿದೆ. ಇದರ ಗ್ರೌಂಡ್ ಕ್ಲಿಯರೆನ್ಸ್ 125mm ಇರುವುದು ಭಾರತದ ಕೆಲವು ರಸ್ತೆಗಳಿಗೆ ಸವಾಲಾಗಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಬುಕಿಂಗ್‌ಗಳು ಈಗಾಗಲೇ ಗುರಗಾಂವ್, ಮುಂಬೈ ಮತ್ತು ಬೆಂಗಳೂರಿನ ಆಯ್ದ ಬಿಗ್‌ವಿಂಗ್ ಟಾಪ್‌ಲೈನ್ ಡೀಲರ್‌ಶಿಪ್‌ಗಳಲ್ಲಿ ಹಾಗೂ ಆನ್‌ಲೈನ್‌ನಲ್ಲಿ ಪ್ರಾರಂಭವಾಗಿವೆ. ಗ್ರಾಹಕರಿಗೆ 2025ರ ಜೂನ್ ತಿಂಗಳಿನಿಂದ ಬೈಕ್‌ನ ಡೆಲಿವರಿಗಳು ಆರಂಭವಾಗಲಿವೆ.
ಮಾರುಕಟ್ಟೆಯಲ್ಲಿ ಹೋಂಡಾ ರೆಬೆಲ್ 500, ಕಾವಾಸಕಿ ಎಲಿಮಿನೇಟರ್ 500 (ರೂ. 5.76 ಲಕ್ಷ), ರಾಯಲ್ ಎನ್‌ಫೀಲ್ಡ್ ಶಾಟ್‌ಗನ್ 650 (ರೂ. 3.59 ಲಕ್ಷದಿಂದ) ಮತ್ತು ಸೂಪರ್ ಮಿಟಿಯರ್ 650 (ರೂ. 3.68 ಲಕ್ಷದಿಂದ) ಹಾಗೂ ಬೆನೆಲ್ಲಿ ಲಿಯಾನ್‌ಸಿನೊ 500ನಂತಹ ಬೈಕ್‌ಗಳೊಂದಿಗೆ ಸ್ಪರ್ಧಿಸಲಿದೆ.
“ಹೋಂಡಾ ರೆಬೆಲ್ 500 ಅನ್ನು ಭಾರತಕ್ಕೆ ತರಲು ನಾವು ಬಹಳ ಉತ್ಸುಕರಾಗಿದ್ದೇವೆ. ಇದು ರೈಡಿಂಗ್ ಉತ್ಸಾಹಿಗಳು ವರ್ಷಗಳಿಂದ ಕಾಯುತ್ತಿದ್ದ ಮೋಟಾರ್‌ಸೈಕಲ್ ಆಗಿದೆ,” ಎಂದು ಹೋಂಡಾ ಮೋಟಾರ್‌ಸೈಕಲ್ ಆಂಡ್ ಸ್ಕೂಟರ್ ಇಂಡಿಯಾದ ಸೇಲ್ಸ್ ಮತ್ತು ಮಾರ್ಕೆಟಿಂಗ್ ಡೈರೆಕ್ಟರ್ ಯೋಗೇಶ್ ಮಾಥುರ್ ಅವರು ಬಿಡುಗಡೆಯ ಸಂದರ್ಭದಲ್ಲಿ ತಿಳಿಸಿದರು.
ಒಟ್ಟಾರೆಯಾಗಿ, ಆಕರ್ಷಕ ಶೈಲಿ, ಉತ್ತಮ ಕಾರ್ಯಕ್ಷಮತೆ ಮತ್ತು ಹೋಂಡಾದ ವಿಶ್ವಾಸಾರ್ಹತೆಯೊಂದಿಗೆ ರೆಬೆಲ್ 500, ಭಾರತದ ಪ್ರೀಮಿಯಂ ಕ್ರೂಸರ್ ಬೈಕ್ ಮಾರುಕಟ್ಟೆಯಲ್ಲಿ ತನ್ನದೇ ಆದ ಸ್ಥಾನವನ್ನು ಗಳಿಸುವ ನಿರೀಕ್ಷೆಯಲ್ಲಿದೆ.
