ಬೆಂಗಳೂರು: ಕೇಂದ್ರ ಸರ್ಕಾರದ ಲಕ್ಷಾಂತರ ನೌಕರರಿಗೆ ಶೀಘ್ರವೇ ಸಿಹಿ ಸುದ್ದಿ ಲಭಿಸುವ ಎಲ್ಲ ಲಕ್ಷಣಗಳು ಗೋಚರಿಸಿವೆ. 8ನೇ ವೇತನ ಆಯೋಗವನ್ನು (8th Pay Commission) ಕೇಂದ್ರ ಸರ್ಕಾರ ರಚಿಸಿದೆ. ಈಗಾಗಲೇ ಆಯೋಗದ ಸದಸ್ಯರು ಶಿಫಾರಸುಗಳನ್ನು ತಯಾರಿಸುವಲ್ಲಿ ನಿರತರಾಗಿದ್ದಾರೆ. ಇದರ ಬೆನ್ನಲ್ಲೇ, ಕೇಂದ್ರ ಸರ್ಕಾರಿ ನೌಕರರ ಸಂಘಟನೆಯು ಕೇಂದ್ರ ಸರ್ಕಾರಕ್ಕೆ ವಿವಿಧ ಬೇಡಿಕೆಗಳನ್ನು ಇರಿಸಿದೆ. ಇವುಗಳಿಗೆ ಆಯೋಗವು ಅನುಮತಿ ಸೂಚಿಸಿದರೆ ನೌಕರರ ಸಂಬಳವು ಮೂರು ಪಟ್ಟು ಹೆಚ್ಚಾಗಲಿದೆ ಎಂದು ಹೇಳಲಾಗುತ್ತಿದೆ.
ಸಂಘಟನೆಯ ಬೇಡಿಕೆಗಳೇನು?
ಕೇಂದ್ರ ಸರ್ಕಾರಿ ನೌಕರರಿಗೆ 3.25ರ ಫಿಟ್ ಮೆಂಟ್ ಅನ್ವಯ ಸಂಬಳ ಹೆಚ್ಚಿಸಬೇಕು ಎಂಬುದು ಸಂಘಟನೆಯ ಪ್ರಮುಖ ಬೇಡಿಕೆ ಹೆಚ್ಚಾಗಿದೆ. ಹಾಗೊಂದು ವೇಳೆ ಕೇಂದ್ರ ಸರ್ಕಾರವು ಕನಿಷ್ಠ 3 ಫಿಟ್ ಮೆಂಟ್ ಅಳವಡಿಕೆ ಮಾಡಿದರೂ, ನೌಕರರ ಬೇಸಿಕ್ ಸಂಬಳದಲ್ಲಿ 3 ಪಟ್ಟು ಜಾಸ್ತಿಯಾಗಲಿದೆ. ಅಂದರೆ, ಈಗ ನೌಕರರ ಬೇಸಿಕ್ ಸಂಬಳವು 18 ಸಾವಿರ ರೂಪಾಯಿ ಇದ್ದರೆ, 8ನೇ ವೇತನ ಆಯೋಗದ ಅನ್ವಯ 54 ಸಾವಿರ ರೂಪಾಯಿ ಆಗಲಿದೆ.
ಇದರ ಜತೆಗೆ, ಪ್ರತಿ ವರ್ಷ ಕೇಂದ್ರ ಸರ್ಕಾರಿ ನೌಕರರ ಸಂಬಳವನ್ನು ಶೇ.5ರಷ್ಟು ಜಾಸ್ತಿ ಮಾಡಬೇಕು ಎಂಬುದು ಕೂಡ ನೌಕರರ ಸಂಘಟನೆಯ ಬೇಡಿಕೆಯಾಗಿದೆ. ವರ್ಷಕ್ಕೆ ಕೇಂದ್ರ ಸರ್ಕಾರವು ಎರಡು ಬಾರಿ ತುಟ್ಟಿ ಭತ್ಯೆಯನ್ನು ಜಾಸ್ತಿ ಮಾಡುತ್ತದೆ. ಇದರ ಹೊರತಾಗಿಯೂ ಶೇ.5ರಷ್ಟು ಸಂಬಳ ಏರಿಕೆ ಮಾಡಬೇಕು ಎಂದು ಬೇಡಿಕೆ ಮುಂದಿರಿಸಲಾಗಿದೆ.
ಹಾಗೊಂದು ವೇಳೆ, ಕೇಂದ್ರ ಸರ್ಕಾರವು ಶೇ.5ರಷ್ಟು ಸಂಬಳ ಹೆಚ್ಚಿಸಲು ಅನುಮತಿ ನೀಡಿದರೆ, ಸಿ ಹಾಗೂ ಡಿ ದರ್ಜೆಯ ಉದ್ಯೋಗಿಗಳಿಗೆ ಭಾರಿ ಅನುಕೂಲವಾಗಲಿದೆ ಎಂದು ಹೇಳಲಾಗುತ್ತಿದೆ. ಕೇಂದ್ರ ಸರ್ಕಾರವು ಪ್ರತಿ 10 ವರ್ಷಕ್ಕೊಮ್ಮೆ ಹೊಸ ಆಯೋಗವನ್ನು ರಚಿಸಿ, ನೌಕರರ ವೇತನವನ್ನು ಹೆಚ್ಚಿಸುತ್ತದೆ. 7ನೇ ವೇತನ ಆಯೋಗದ ಅವಧಿಯು 2025ರ ಡಿಸೆಂಬರ್ 31ರಂದು ಮುಗಿದಿದೆ. ಹಾಗಾಗಿ, ಹೊಸ ವೇತನ ಆಯೋಗದ ಶಿಫಾರಸುಗಳ ಜಾರಿಗೆ ನೌಕರರು ಕಾಯುತ್ತಿದ್ದಾರೆ.
ಇದನ್ನೂ ಓದಿ : ಭಾರತಕ್ಕೆ ಮರಳಿದ ‘ರಸ್ತೆಗಳ ರಾಜ’ ರೆನಾಲ್ಟ್ ಡಸ್ಟರ್ | ಬುಕಿಂಗ್ ಆರಂಭ.. ಮಾರ್ಚ್ನಲ್ಲಿ ಬೆಲೆ ಪ್ರಕಟ!
