ಬೆಂಗಳೂರು: ಆರೋಗ್ಯ ವಿಮೆ, ಟರ್ಮ್ ಇನ್ಶೂರೆನ್ಸ್ ಸೇರಿ ಯಾವುದೇ ವಿಮೆಯನ್ನು ಖಾಸಗಿ ಕಂಪನಿಗಳಲ್ಲಿ ಮಾಡಿಸಲು ಹೋದರೆ ವರ್ಷಕ್ಕೆ ಸಾವಿರಾರು ರೂಪಾಯಿ ಪ್ರೀಮಿಯಂ ಕಟ್ಟಬೇಕು. ಇದನ್ನು ಮನಗಂಡ ಅಂಚೆ ಕಚೇರಿಯು ಬಡವರು ಹಾಗೂ ಮಧ್ಯಮ ವರ್ಗದವರಿಗಾಗಿಯೇ ಹೊಸ ವಿಮಾ ಯೋಜನೆ ಜಾರಿಗೆ ತಂದಿದೆ. ಇಂಡಿಯಾ ಪೋಸ್ಟ್ ಪೇಮೆಂಟ್ಸ್ ಬ್ಯಾಂಕ್ ಹಾಗೂ ರಾಯಲ್ ಸುಂದರಂ ಜನರಲ್ ಇನ್ಶೂರೆನ್ಸ್ ಕಂಪನಿ ಜತೆಗೂ ಅಪಘಾತ ವಿಮೆಯನ್ನು ಘೋಷಿಸಿವೆ.
ಹೌದು, ಪೋಸ್ಟ್ ಆಫೀಸ್ ನ ಅಂಚೆ ಕಚೇರಿ ವಾರ್ಷಿಕ ವಿಮಾ ಯೋಜನೆ ಅನ್ವಯ ವರ್ಷಕ್ಕೆ 565 ರೂಪಾಯಿ ಪ್ರೀಮಿಯಂ ಕಟ್ಟಿದರೂ ಸಾಕು, ಪಾಲಿಸಿದಾರರಿಗೆ 10 ಲಕ್ಷ ರೂಪಾಯಿ ಸುರಕ್ಷತೆ ನೀಡುತ್ತದೆ. ಇದೊಂದು ಅಪಘಾತ ವಿಮೆಯಾಗಿದ್ದು, ಅಪಘಾತದಲ್ಲಿ ಮೃತಪಟ್ಟರೆ, ಶಾಶ್ವತ ಅಂಗವೈಕಲ್ಯಕ್ಕೆ ತುತ್ತಾದರೆ ನೆರವು ನೀಡುತ್ತದೆ. ಹತ್ತಿರದ ಅಂಚೆ ಕಚೇರಿಗೆ ತೆರಳಿ ವಿಮೆ ಮಾಡಿಸಬಹುದಾಗಿದೆ.
ಯೋಜನೆಗೆ ಯಾರೆಲ್ಲ ಅರ್ಹರು?
18ರಿಂದ 65 ವರ್ಷದೊಳಗಿನ ಭಾರತೀಯ ನಾಗರಿಕರು ಯೋಜನೆಯನ್ನು ಆಯ್ಕೆ ಮಾಡಿಕೊಳ್ಳಬಹುದಾಗಿದೆ. ವಿಮೆ ಮಾಡಿಸಲು ಯಾವುದೇ ವೈದ್ಯಕೀಯ ದಾಖಲೆಗಳ ಅಗತ್ಯವಿಲ್ಲ. ಸರ್ಕಾರಿ ನೌಕರರು, ಕೂಲಿ ಕಾರ್ಮಿಕರು, ಸ್ವಯಂ ಉದ್ಯೋಗ ಕೈಗೊಂಡವರು, ಗೃಹಿಣಿಯರು ಕೂಡ ವಿಮೆ ಮಾಡಿಸಬಹುದಾಗಿದೆ.
ಏನೆಲ್ಲ ಇದೆ ಸೌಲಭ್ಯ?
ವಿಮೆ ಮಾಡಿಸಿದವರು ಅಪಘಾತದಲ್ಲಿ ಮೃತಪಟ್ಟರೆ, ಅವರ ಕುಟುಂಬಸ್ಥರು ಅಥವಾ ನಾಮಿನಿಗಳಿಗೆ 10 ಲಕ್ಷ ರೂಪಾಯಿ ಪರಿಹಾರ ನೀಡಲಾಗುತ್ತದೆ. ಅಪಘಾತದಲ್ಲಿ ಶಾಶ್ವತ ಅಂಗವೈಕಲ್ಯಕ್ಕೆ ತುತ್ತಾದರೂ 10 ಲಕ್ಷ ರೂಪಾಯಿ ನೀಡಲಾಗುತ್ತದೆ. ಅಪಘಾತದಿಂದ ಗಾಯಗೊಂಡು ಆಸ್ಪತ್ರೆ ಸೇರಿದರೆ ಚಿಕಿತ್ಸೆಗಾಗಿ 50 ಸಾವಿರ ರೂಪಾಯಿ ನೀಡಲಾಗುತ್ತದೆ. ವಿಮಾದಾರರು ಅಪಘಾತದಲ್ಲಿ ಮೃತಪಟ್ಟರೆ ಅವರ ಮಕ್ಕಳಿಗೆ ಶೈಕ್ಷಣಿಕ ವೆಚ್ಚವಾಗಿ 25 ಸಾವಿರ ರೂಪಾಯಿ ನೀಡಲಾಗುತ್ತದೆ.
