ಬೆಂಗಳೂರು: ಬದುಕು ಈಗ ತುಂಬ ಅನಿಶ್ಚಿತತೆಯಿಂದ ಕೂಡಿದೆ. ಈಗ ನಮ್ಮೆದುರು ಇದ್ದವರು ನಾಳೆ ಇರುವುದಿಲ್ಲ. ಹೃದಯಾಘಾತ, ಅಪಘಾತಗಳು ಸೇರಿ ಹಲವು ಕಾರಣಗಳಿಂದಾಗಿ ಮನುಷ್ಯನ ಬದುಕು ಅನಿಶ್ಚಿತವಾಗಿದೆ. ಹಾಗಾಗಿ, ಅಪಘಾತ ಸೇರಿ ಯಾವುದೇ ದಿಢೀರ್ ಸಾವು ಸಂಭವಿಸುವ ಕಾರಣ ಕುಟುಂಬದ ಸುರಕ್ಷತೆಯಿಂದಾಗಿ ವಿಮೆ ಮಾಡಿಸುವುದು ಅತ್ಯಗತ್ಯವಾಗಿದೆ. ಅದರಲ್ಲೂ, ಪೋಸ್ಟ್ ಆಫೀಸ್ ನಲ್ಲಿ ವರ್ಷಕ್ಕೆ ಕೇವಲ 399 ರೂ. ಪ್ರೀಮಿಯಂ ಕಟ್ಟಿದರೆ ಸಾಕು, 10 ಲಕ್ಷ ರೂ. ಕವರೇಜ್ ಸಿಗುತ್ತದೆ. ಪ್ರತಿಯೊಬ್ಬರೂ ಈ ಯೋಜನೆಯನ್ನು ಆಯ್ಕೆ ಮಾಡಿಕೊಳ್ಳಬಹುದಾಗಿದೆ.
ಹೌದು, ವಿಮೆ ದುಬಾರಿ ಎನ್ನುವವರಿಗಾಗಿಯೇ ಅಂಚೆ ಇಲಾಖೆ ಹೊಸ ಗುಂಪು ಅಪಘಾತ ವಿಮೆ ಯೋಜನೆಯನ್ನು ಜಾರಿಗೆ ತಂದಿದೆ. ಕೇವಲ 399 ರೂ. ವಾರ್ಷಿಕ ಪ್ರೀಮಿಯಂ ಕಟ್ಟಿದರೆ ಸಾಕು 10 ಲಕ್ಷ ರೂ. ಮೊತ್ತದ ಆ್ಯಕ್ಸಿಡಂಟ್ ಕವರೇಜ್ ಲಭಿಸುತ್ತದೆ. ಅಪಘಾತದಂತಹ ತುರ್ತು ಸಂದರ್ಭಗಳು ಯಾರಿಗೆ ಬೇಕಾದರೂ ಎದುರಾಗಬಹುದು. ಅದನ್ನು ನಿಯಂತ್ರಿಸಲು ಯಾರಿದಲೂ ಸಾಧ್ಯವಿಲ್ಲ. ಆದರೆ ಖಂಡಿತವಾಗಿಯೂ ಅಪಘಾತದಂತಹ ಸಂದರ್ಭಗಳನ್ನು ಎದುರಿಸಲು ಆರ್ಥಿಕ ಸುರಕ್ಷತೆಗಾಗಿ ಪ್ರತಿಯೊಬ್ಬರೂ ವಿಮೆ ಮಾಡಿಸಿಕೊಂಡು ಒಂದಿಷ್ಟು ತಯಾರಿ ಮಾಡಿಕೊಳ್ಳಬಹುದು.
ಅಂಚೆ ಇಲಾಖೆ ವ್ಯಾಪ್ತಿಯಲ್ಲಿ ಬರುವ ಇಂಡಿಯಾ ಪೋಸ್ಟ್ ಪೇಮೆಂಟ್ಸ್ ಬ್ಯಾಂಕ್ ಇದೀಗ ತನ್ನ ಗ್ರಾಹಕರಿಗಾಗಿ 10 ಲಕ್ಷ ರೂ. ಕವರೇಜ್ ಇರುವ ವೈಯಕ್ತಿಕ ಗುಂಪು ಅಪಘಾತ ವಿಮೆ ಯೋಜನೆ ಜಾರಿಗೊಳಿಸಿದೆ. ಇಂಡಿಯಾ ಪೋಸ್ಟ್ ಪೇಮೆಂಟ್ಸ್ ನ ಎಲ್ಲ ಗ್ರಾಹಕರಿಗೆ ಇದು ಅನ್ವಯವಾಗಲಿದೆ. 18 ರಿಂದ 65 ವಯಸ್ಸಿನ ಎಲ್ಲ ಗ್ರಾಹಕರು ವಾರ್ಷಿಕ ಪ್ರೀಮಿಯಂ ಕಟ್ಟುವ ಮೂಲಕ ಈ ವಿಮೆ ಪಡೆದುಕೊಳ್ಳಬಹುದಾಗಿದೆ.
ಉನ್ನತ ದರ್ಜೆಯ ಪ್ಲಾನ್ ನ ಪ್ರೀಮಿಯಂ 399 ರೂ. ಆಗಿದೆ. ಪ್ರತಿ ವರ್ಷ ನಿಗದಿತ ಪ್ರೀಮಿಯಂ ಕಟ್ಟಿ ಪಾಲಿಸಿ ನವೀಕರಣ ಮಾಡಿಕೊಳ್ಳಬಹುದಾಗಿದೆ. ಅಂಚೆ ಕಚೇರಿಗಳಲ್ಲಿ ಈ ಯೋಜನೆ ಜಾರಿಯಲ್ಲಿದ್ದು ಕೈವೈಸಿ ದಾಖಲೆ ನೀಡಿ ಅರ್ಹರು ವಿಮೆ ಪಡೆದುಕೊಳ್ಳಬಹುದಾಗಿದೆ. ಇಂಡಿಯಾ ಪೋಸ್ಟ್ ಪೇಮೆಂಟ್ಸ್ ಖಾತೆ ಹೊಂದುವ ಯಾರುಬೇಕಾದರೂ ಈ ವಿಮೆ ಪಡೆದುಕೊಳ್ಳಬಹುದಾಗಿದೆ. ಅಪಘಾತದಿಂದ ಸಾವು, ಭಾಗಶಃ ಅಂಗವೈಕಲ್ಯತೆ, ಶಾಶ್ವತ ಅಂಗವೈಕಲ್ಯತೆಗೆ ಇದರಲ್ಲಿ 10 ಲಕ್ಷ ಕವರೇಜ್ ಲಭಿಸಲಿದೆ. ಇದಲ್ಲದೆ ಅಪಘಾತದ ಚಿಕಿತ್ಸೆಗೆಗಾಗಿ 30 ಸಾವಿರ ರೂ.ನಿಂದ 60 ಸಾವಿರ ರೂ.ವರೆಗೆ ಕ್ಲೇಮ್ ಮಾಡಿಕೊಳ್ಳಬಹುದಾಗಿದೆ.
