ಬೆಂಗಳೂರು: ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಫ್ರಾಂಚೈಸಿ ಮತ್ತೊಮ್ಮೆ ತನ್ನ ಲೋಗೋ ಬದಲಿಸಿಕೊಂಡಿದೆ.
ಈ ಬದಲಾವಣೆಯೊಂದಿಗೆ ರಾಯಲ್ ಚಾಲೆಂಜರ್ಸ್ ಬ್ಯಾಂಗಲೋರ್ ಹೆಸರನ್ನು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಎಂದು ಮರುನಾಮಕರಣ ಮಾಡಿಕೊಂಡಿದೆ. ಈ ಬಾರಿಯ ಬದಲಾವಣೆಯೊಂದಿಗೆ ಇಲ್ಲಿಯವರೆಗೆ ಆರ್ ಸಿಬಿ ಒಟ್ಟು 5 ಬಾರಿ ಲೋಗೋ ಬದಲಾಯಿಸಿದಂತಾಗಿದೆ. ಆರ್ ಸಿಬಿ ತನ್ನ ಮೊದಲ ಲೋಗದಲ್ಲಿ RC (ರಾಯಲ್ ಚಾಲೆಂಜರ್ಸ್) ಎದ್ದು ಕಾಣುವಂತೆ ಚಿತ್ರಿಸಿದ್ದರು. ಅಂದರೆ ಇಲ್ಲಿ ಸಿಂಹದ ಗುರುತಿಕ್ಕಿಂತ ರಾಯಲ್ ಚಾಲೆಂಜರ್ಸ್ ಬರಹಕ್ಕೆ ಹೆಚ್ಚಿನ ಆದ್ಯತೆ ನೀಡಲಾಗಿತ್ತು.
2009 ರಲ್ಲಿ ಬಣ್ಣಗಳಲ್ಲಿ ಬದಲಾವಣೆ ತರಲಾಗಿತ್ತು. 2016 ರಲ್ಲಿ RC ಬದಲಿಗೆ ಸಿಂಹದ ಚಿತ್ರಕ್ಕೆ ಹೆಚ್ಚಿನ ಪ್ರಾಶಸ್ತ್ಯ ನೀಡಲಾಗಿತ್ತು. 2020ರಲ್ಲಿ ಲೋಗೋದಿಂದ RC ಬರಹ ತೆಗೆದು ಹಾಕಿ ಸಿಂಹದ ಗುರುತು ಹೈಲೈಟ್ ಮಾಡಿತ್ತು.
ಆದರೆ, ಈ ಬಾರಿ ರಾಯಲ್ ಚಾಲೆಂಜರ್ಸ್ ಬ್ಯಾಂಗಲೋರ್ ತಂಡ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹೆಸರಿನೊಂದಿಗೆ ಅಖಾಡಕ್ಕೆ ಇಳಿಯಲಿದೆ. ಅಲ್ಲದೇ, ಈ ಬಾರಿ ಲೋಗೋಗದಲ್ಲಿ RCB ಎಂದು ಕೂಡ ಬರೆದುಕೊಂಡಿದೆ.
